Foto: QR DSM
Almaty Balalar shuǵyl meditsinalyq kómek kórsetý ortalyǵynda qazaqstandyq dárigerler toby jańa týǵan nárestege álemdik tájiribede nebári 30 ret tirkelgen asa sirek kezdesetin patologiia boiynsha sátti ota jasady, dep habarlaidy Ult.kz.
Sábidiń ómiri úshin kúres onyń jaryq dúniege alǵash kelgen sátinen bastaldy, sebebi bet pen moiyn tusynda paida bolǵan 4h4 sm kólemdegi úlken óskin keńirdek pen joǵarǵy tynys joldaryn qysyp tastaǵandyqtan, náreste ózdiginen dem ala almady.
Jańa týǵan náresteler reanimatsiiasy bólimshesiniń meńgerýshisi Ulyqpan Álseiitovtyń aitýynsha, balanyń jaǵdaiy óte aýyr bolǵan. Dárigerler bastapqyda bul qatersiz isik – limfangioma dep topshylaǵanymen, rentgen, KT jáne MRT óskinniń ómirlik mańyzy bar qan tamyrlar men shetki júike talshyqtaryn da qamtyǵanyn kórsetti.
Ortalyqtyń jaq-bet hirýrgi, meditsina ǵylymdarynyń doktory Serik Nurmaǵanovtyń basshylyǵymen jáne anesteziolog Ulyqpan Álseiitov, neonataldy hirýrg Samatbek Myrzahmet qatysqan eki saǵattyq kúrdeli ota nátijesinde kólemdi túzilis tolyqtai alynyp tastaldy. Alaida, gistologiialyq zertteý nátijeleri «isik» dep oilaǵan tinniń geterotopiialyq mi tini ekenin anyqtady. Bul – embrion damýy kezinde mi jasýshalarynyń bas súiek qýysy syrtynda ornalasýynan týyndaityn asa sirek týa bitken anomaliia. Dúniejúzilik meditsinalyq ádebiette osyǵan uqsas nebári 30 jaǵdai ǵana sipattalǵan.
Qaiǵyly aiaqtalýy múmkin oqiǵa tolyqtai sátti aiaqtalyp, sábi úiine shyǵaryldy. Ortalyq direktory Álibek Smaǵulov prenataldyq diagnostikanyń mańyzy zor ekenin jáne mundai naýqastardyń ómir súrý múmkindigi joǵary ekenin atap ótti.
