Eki jyl buryn memleketimizdiń búkil aqparattyq-ideologiialyq jumysy Investitsiialar jáne damý ministrliginiń bailanys, aqparattandyrý jáne aqparat komiteti siiaqty kishigirim mekemeniń quzyrynda boldy. Ol salany premer-ministrdiń orynbasary qadaǵalaǵan bolatyn.
Atalmysh tulǵaǵa áleýmettik máselelermen birge ideologiia menen BAQ saiasaty salasy da ótken bolatyn. Keiin aqparat jáne kommýnikatsiialar ministrligi qaita qurylǵan kezde bul komitet AKM-niń qaramaǵyna ótti, Sol kúni, osyǵan qosa “ideologiialyq baǵytty kúsheitý” maqsatynda jańa – Din isteri jáne azamattyq qoǵam ministrligi quryldy.
2017 jyldyń basyna deiin tutastai eki ministrliktiń qolynan saiasi jumysty júrgizý tolyqqandy kelmedi. Baspasóz ben saiasattanýshylardyń barlyǵy derlik osy máseleni kóterip, joǵarǵy bilikke suraqty tótesinen qoiǵany esimizde.
Ótken jyldyń basynan bul qurylmardyń da beti beri qarap, ishki saiasattaǵy ahýal da ózgergendei boldy. Qysqasha aitsaq, liberaldy jylymyqtyń lebi sezile bastady.
Jańaózen tragediiasy oryn alǵan soń, prezident Nazarbaev: «Men baiaǵyda keletin edim. Oibai, barlyǵy durys bolyp jatyr. Barmai-aq qoiyńyz, qazir sheshiledi. …Barlyǵy da aldady» dep aitqany bar.
Áleýmettik máseleniń sheshilmei, kerisinshe ýshyqtyrylyp onyń saiasilanýy úlken qaiǵyǵa ákep soqqanynan memlekettik apparat oryn alǵan jaǵdaidan birden sabaq almai, ekinshi úlken daýǵa – “jer máselesine” oryn berdi. Tek osy aftershoktan keiin ishki saiasatta paradigmany ózgertý kún tártibine shyqty..
Aqparattyq saiasatta júieli ózgerister bastaldy. Memlekettiń aqparattyq saiasaty jańardy. Memlekettik BAQ kez kelgen qoǵamdyq máseleni nazardan tys qaldyrmaidy. Qoǵamdyq pikirge qulaq túretin boldy.
Memleket pen bilik daǵdarysy negizgi sheshim qabyldaityn basty tulǵanyń aqparat kózderinen ajyratylyp, onyń jetkilikti túrde mańyzdy máselelerden beihabar bolýynan týyndap jatady. Bizdiń tarihymyzda da ońdai kezder boldy. Joǵaryda atalyp ótken Jańaózen oqiǵasy – sonyń bir dáleli.
Bul máselege jaýapty – sol ýaqyttaǵy prezident ákimshiliginiń basshylyǵy ekeni kúmánsiz. Aqparattyq saiasatty tek nasihat quraly ǵana retinde qarastyrylǵan kezeń sol basshylyqtyń ótken jyldyń basynda quryqtalǵan kúnimen aiaqtaldy. Sońǵy jyly kóptegen qordalanyp kelgen problemalardan memleket basshysynyń habardar ekenine kózimiz jetti.
Bul rette resmi aqparat quraldarynyń kelesidei úilestirý júiesi boiynsha iske asyp jatqanynyń dáleli: Memlekettik BAQ – Prezident Ákimshiligi – Úkimet – Óńirler – Resmi BAQ. Bul úilestirý júiesi bolashaqta joǵarǵy biliktiń aqparattan qur qalyp, bilik daǵdarysy ornaýynan saqtaidy.
Bilik qazaq qoǵamyn alańdatatyn máselelerdi sheshýge umtylatynyn baiqaǵanymyzdy da atap óteiik. Jaqynda ǵana májiliste ótken jumyspen qamtýǵa qatysty parlamenttik tyńdaý qazaq tilinde júrgizilip, baiandamalardyń kópshiligi memlekettik tilde jasaldy. Jalpy Prezident ákimshiliginiń ishki saiasi blogy múlde jańa saiasi jaǵdaidy qalyptastyryp, saiasi protsestegi kún tártibin anyqtaýdy óz qolyna aldy. Muny moiyndaý kerek.
Nurǵali Nurtai,
.jpeg)