Elimizdiń birqatar óńirinde para alǵany úshin isti bolǵan politsiia qyzmetkerlerine sot úkimi shyqty. Bul týraly QR Sybailas jemqorlyqqa qarsy is-qimyl agenttiginen málim etti, dep habarlaidy "Ult aqparat".
«QR Sybailas jemqorlyqqa qarsy is-qimyl agenttigi memlekettik organdardaǵy jemqorlyq kórinisteriniń aldyn alý jáne jolyn kesý jumystaryn turaqty negizde únemi júrgizip keledi. Olardyń keibirinde, onyń ishinde ishki ister organdarynda jemqorlyq táýekeliniń deńgeii joǵary bolyp tur. Máselen, respýblika óńirlerinde túrli laýazymdy qyzmet atqarǵan politsiia qyzmetkerlerine qatysty ótken aptada aiyptaý úkimi shyqty», - delingen vedomstvo taratqan aqparatta.
Atap aitqanda, Qaraǵandy qalasy Oktiabr aýdandyq sotynyń úkimimen júk avtokólik quralynyń kedergisiz júrýi men jalpy qamqorlyǵy úshin jeke tulǵadan para alǵan jol-sholǵynshy politsiia polkiniń rota komandiri, politsiia maiory M.Kaskinge aiyppul salyndy. Al Qostanai qalasynyń №2 sotynyń úkimimen jalpy qamqorlyǵy úshin qaramaǵyndaǵy qyzmetkerlerinen para alyp, biligin asyra paidalanǵan Jetiqara qalalyq politsiia bólimi jergilikti politsiia bóliminiń bólimshe bastyǵy, politsiia maiory Q.Ysqaqov 15 mln teńge aiyppul tóleitin boldy. Dál osy qalalyq sottyń úkimimen jeńgetailyqpen ainalysqan tulǵanyń qylmystyq áreketterge qamqorlyq tanytqany úshin Qostanai oblystyq politsiia departamenti uiymdasqan qylmyspen kúres basqarmasynyń jedel ýákili politsiia maiory M.Erboluly men politsiia kapitany A.Saqov 5 jyldaryn túrmede ótkizedi. Óskemen qalalyq №2 sotynyń úkimimen kúdiktini qylmystyq jaýapkershilikten jaltartqany úshin 250 myń teńge para alǵan Úlbi aýdandyq politsiia bóliminiń aǵa tergeýshisi D.Alqanov 7,5 mln teńge aiyppul tóleidi.
«Atalǵan tulǵalardyń barlyǵy ómir boiy memlekettik qyzmette laýazymdy qyzmet atqarý quqyqtarynan, sonymen qatar politsiia ofitseri arnaiy shenderinen aiyryldy», - dep atap ótedi agenttikten.
