QR IIM Kadr saiasaty departamenti basqarmasynyń bastyǵy Aqan Nuryshev Ishki ister ministrliginiń JOO-syna qabyldaý qaǵidalarynyń qalai ózgregenin túsindirdi, dep habarlaidy QazAqparat.
«Ishki ister organdaryn jańǵyrtý jol kartasy aiasynda vedomstvolyq bilim berýdiń irikteý, oqytý, biliktiligin arttyrý jáne qaita daiarlaý máselelerin júzege asyrý bóligi jańǵyrtylyp jatyr. Qazir vedomstvolyq bilim berý ońtailandyrylǵan, oqý oryndary olardyń mamandanýyna qarai qaldyryldy. Qaraǵandy akademiiasy tergeýshiler men kriminalisterdi, Almaty akademiiasy – jedel jáne tehnikalyq qyzmetkerlerdi, Qostanai akademiiasy – ákimshilik politsiia jáne qylmystyq-atqarý júiesi qyzmetkerlerin, Aqtóbe institýty – ákimshilik politsiia qyzmetkerlerin, Shymkent oqý ortalyǵy – mamandandyrylǵan kúzet qyzmetin daiarlaidy», - dedi A. Nuryshev ministrliktiń aptalyq brifingtinde.
Spikerdiń aitýynsha, jańǵyrtý aiasynda oqytý tásilderi aitarlyqtai ózgergen, arnaiy politsiia taktikasy, ishki ister qyzmetkerlerin psihologiialyq daiarlaý, aqparattyq-kommýnikatsiialyq tehnologiialar syndy jańa arnaiy kýrstar men pánder engizilgen. Kadrlardyń biliktiligin arttyrý jáne qaita daiarlaý bóliginde qazir barlyq oqý oryndarynda Ishki ister organdarynyń qyzmetkerlerin psihologiialyq daiarlaý, halyqpen jumystyń servistik formaty boiynsha kýrstar júrgiziledi.
«Bakalavriat baǵyty boiynsha JOO-ǵa túskisi keletin talapker mindetti túrde aýmaqtyq ishki ister organdarynyń kadr qyzmetteri arqyly nemese tikelei oqý oryndaryna ótinim beredi. Sondai-aq ótinimdi elektrondy túrde berýge bolady, oǵan jeke kýáliktiń kóshirmesi, fotosýretter, ómirbaian, bilimi týraly qujattyń kóshirmesi qosa beriledi. Aýmaqtyq ishki ister organynyń jáne oqý oryndarynyń kadr qyzmetteri oqý kandidattaryn qarastyrady, meditsinalyq kýálandyrýǵa jiberedi, arnaiy tekserý júrgizedi jáne jeke isterin 1 shildege deiin IIM-niń tiisti joǵary oqý oryndaryna jiberedi», - deidi A. Nuryshev.
Oqýǵa úmitkerler UBT-ny 5 shildege deiin tapsyrady. UBT Qazaqstan tarihy, matematikalyq saýattylyq, oqý saýattylyǵy jáne eki beiindi pán boiynsha ótkiziledi. Jańashyldyqtardyń biri –Qaraǵandy akademiiasyna túskisi keletinder kez kelgen eki beiindik pándi tańdai alady. UBT qorytyndysy boiynsha keminde 50 ball, onyń ishinde árbir pán boiynsha – keminde 5 ball jinaý qajet.
UBT tapsyrǵan soń talapkerler belgilengen merzimge sáikes oqý ornyna keledi. Oqýǵa qabyldaýdy JOO-nyń qabyldaý komissiiasy úsh kezeńde uiymdastyrady: túpkilikti meditsinalyq kýálandyrý, talapkerlerdiń dene daiyndyǵyn tekserý, uldar men qyzdar úshin: 100 jáne 1000 metrge júgirý. Uldar biik beltemirge tartylady, al qyzdar – 1 minýt boiy arqada jatyp deneni kóteredi. Úshinshi kezeń – meditsinalyq kórsetkishter men dene shynyqtyrý daiyndyǵynyń nátijeleri boiynsha irikteýdi eskerip, UBT qorytyndysyna sáikes talapkerlerdi qabyldaý.
Kandidatty qyzmetke jaramdylyǵyn anyqtaý úshin meditsinalyq jáne psihofiziologiialyq tekserý, sondai-aq kandidatty arnaiy esepke alý bazalary boiynsha tekserý júrgiziledi.
Oqý oryndaryna irikteý dalalyq oqý lagerlerinde ótedi. Dene shynyqtyrý daiarlyǵy synaqtarynyń nátijesimen kelispegen kandidat apelliatsiiaǵa ótinish berýge quqyly. Apelliatsiialyq komissiiany tiisti oqý ornynyń bastyǵy qurady. Ótinish nátije jariialanǵannan keiingi kúni saǵat 13.00-ge deiin beriledi. Ótinish táýlik ishinde qaralady. Ótinish bergen árbir kandidat bir fizikalyq synaqty qaita tapsyrýǵa quqyly.
