26 qarasha kúni QR Ishki ister ministrligi, aýmaqtyq organdar men ishki ister bólimsheleri jáne qylmystyq-atqarý júiesi departamentteri alǵash ret ZOOM platformasy arqyly azamattardy biryńǵai qabyldaý kúnin ótkizedi, dep habarlaidy QazAqparat.
«QR Ishki ister ministri Erlan Turǵymbaevtyń tapsyrmasymen IIM, aýmaqtyq organdar men ishki ister bólimsheleri jáne qylmystyq-atqarý júiesi departamentteri 26 qarashada alǵash ret ZOOM internet platformasy arqyly azamattardy biryńǵai qabyldaý kúnin ótkizedi. Sharanyń negizgi maqsaty – halyqpen keri bailanysty qamtamasyz etý, olardyń problemalyq máselelerin sheshý, sondai-aq «halyq únine qulaq asatyn memleket» tujyrymdamasyn iske asyrýǵa baǵyttalǵan senim deńgeiin arttyrý», - dedi QR Ishki ister ministrliginiń resmi ókili Nurdildá Oraz ministrlikte ótken onlain brifingte.
ZOOM platformasynda ministr men onyń orynbasarlary úshin aýmaqtyq departamentter basshylyǵy qosylatyn jeke bailanys arnalary iske qosylady. Tirkelgen azamattar men sharanyń basqa da qatysýshylaryna konferentsiia identifikatorlary, qosylý ádisteri men qupiiasózder aldyn ala jiberiledi.
Qabyldaý ýaqyty:
- IIM basshylyǵy – saǵat 10.00-den 13.00-ge deiin.
- aýmaqtyq ishki ister organdary men bólimsheleriniń jáne qylmystyq-atqarý júiesiniń basshylary – saǵat 15.00-den 18.00-ge deiin.
Ministrdiń, politsiia jáne qylmystyq-atqarý júiesi departamentteri basshylarynyń qabyldaýyna jazylý úshin 23-25 qarasha aralyǵynda IIM portalyndaǵy, ministrliktiń áleýmettik jeli paraqshalaryndaǵy jáne Polisia.kz saityndaǵy telefondarǵa, elektrondyq poshta men WhatsApp-nómirlerine habarlasý qajet.
