Qazaqstannyń Densaýlyq saqtaý ministrligi Reseidiń Irkýtsk oblysyndaǵy epidemiologiialyq jaǵdaidy baqylaýda ustap otyr, dep habarlaidy ult.kz.
Buǵan Irkýtsk oblysynda asa qaýipti infektsiiaǵa kúdik keltirilgen jaǵdai týraly aqparat sebep bolǵan.
Ministrliktiń málimetinshe, Qazaqstandaǵy epidemiologiialyq ahýal turaqty. Memlekettik shekaradaǵy ótkizý pýnktterinde sanitariialyq-karantindik baqylaý júrgizilip jatyr.
Qazirgi ýaqytta kóliktiń barlyq túrlerimen elge kirgen adamdar arasynan dene qyzýy joǵarylaǵan, aýrý belgileri nemese asa qaýipti infektsiiaǵa kúdigi bar azamattar anyqtalmaǵan.
Aldyn ala baǵalaý boiynsha, infektsiianyń Qazaqstanǵa ákeliný qaýpi tómen deńgeide.
Al Reseide mamandar epidemiologiialyq tergep-tekserý júrgizip jatyr. Qazirgi ýaqytta yqtimal juqtyrý kózi men oqiǵanyń mán-jailary anyqtalýda. Diagnoz ázirge resmi túrde rastalǵan joq.
Meditsinalyq baqylaýda 197 bailanysta bolǵan adam bar. Qolda bar málimet boiynsha, olardan aýrý belgileri anyqtalmaǵan, zerthanalyq zertteý nátijeleri teris.
Sondai-aq Shelehov aýdandyq aýrýhanasynda qajetti epidemiiaǵa qarsy sharalar júrgizilip jatyr.
Reseidiń Rospotrebnadzory 4 qazanda Irkýtsk oblysynda, Irkýtsk qalasy men Shelehovta sanitariialyq-epidemiologiialyq jaǵdai turaqty ekenin habarlaǵan. Vedomstvo oba aýrýynyń jaǵdailary anyqtalmaǵanyn málimdedi.
Al Irkýtsk oblysynda qaitys bolǵan 28 jastaǵy áieldiń ólim sebebi ázirge etiologiiasy anyqtalmaǵan pnevmoniia retinde sipattalyp otyr.
Densaýlyq saqtaý ministrligi azamattarǵa tek resmi aqparat kózderine senýge keńes berdi. Sapardan keiin aýrý belgileri paida bolsa, meditsinalyq kómekke júginip, dárigerge barǵan jeri men sapar kúnderi týraly habarlaý qajet.
