Qazaqstan Prezidenti Nursultan Nazarbaev «Uly dalanyń jeti qyry» atty maqalasynda jańa tarihi diskýrsqa muryndyq boldy. Bul týraly QR Prezidenti janyndaǵy Qazaqstan Strategiialyq zertteýler institýtynyń bas ǵylymi qyzmetkeri, tarih ǵylymdarynyń doktory Irina Chernyh aityp berdi, dep jazady QazAqparat agenttigi.
«Menińshe, Prezidenttiń osy maqalasy - onyń qoǵamdyq sanany jańǵyrtý jónindegi alǵashqy maqalasynyń logikalyq jalǵasy. Óitkeni, Nursultan Ábishuly Nazarbaev birinshi maqalasynda-aq qazaq halqynyń tarihy jaily aita kelip, «Biz kimbiz?», «Qaida baramyz?» degen siiaqty suraqtardy kóldeneń qoiǵan bolatyn. Iaǵni, birinshi maqala jalpy qazaqstandyq sáikestikti qalyptastyrý máselelerine arnaldy. Myna maqala da jalpy sáikestikti qalyptastyrýǵa qatysty, biraq endi Prezident tarih tuńǵiyǵyna tereńdei otyryp, keńirek ashyp kórsetedi. Iaǵni, ol, eń aldymen, Qazaqstan - Uly dala eli ekenin aitady», - deidi Irina Chernyh.
Sarapshy qazir Qazaqstan álemge munaiymen, EQYU-ǵa tóraǵalyq etýimen, iadrolyq qarýdy taratpaý baǵdarlamasy jáne basqa da birqatar halyqaralyq bastamasymen tanylǵanyn tilge tiek etti.
«Búginde Prezident «Qazaqstan - Uly dala eli» jańa tarihi diskýrsyna muryndyq bolyp otyr. Ol óz maqalasynda Qazaqstan ornalasqan Uly dala keńistiginiń ne ekenin naqtylaidy. Biz ózimizge tarih prizmasy arqyly qaraimyz. Osy maqalada Prezidenttiń qazirgi qazaqstandyqtardyń ata-baba mekenine, olardyń jahandyq tarihqa, jahandyq órkenietke qosqan úlesine taldaý júrgizedi. Ol osy jerde oilap tabylǵan, jahandyq órkeniettiń damýyna ólsheýsiz úles qosqan buiymdar týraly aitady. Iaǵni, bizdiń bolmysymyzdy, ótkenimiz ben búginimizdi kórsetedi ári bul - Prezident aitqan qoǵamdyq sanany jańǵyrtýdyń jalǵasy», - deidi Irina Chernyh.
Sarapshy «Rýhani jańǵyrý» baǵdarlamasy aiasyndaǵy «Qazaqstannyń kieli jerleriniń geografiiasy» jáne «Týǵan jer» jobalaryn eske saldy.
«Qazir Prezident Qazaqstannyń tarihymen, zertteýlerdi damytýmen bailanysty burynǵydan da kóbirek usynystar aityp jatyr. Mysaly, «Arhiv-2025», «Uly dalanyń uly esimderi» sekildi tarihpen bailanysty, biz kimbiz, qaida baramyz degen siiaqty máselelerge arnalǵan kóptegen bastamalardy alǵa tartty», - deidi tarihshy ǵalym.
.jpeg)