Iri kásiporyn qaýymdastyqtarynyń ýájine qaramastan Ekologiia kodeksi ýaqytynda qabyldanady. Ekologiia, geologiia jáne tabiǵi resýrstar vitse-ministri Ahmetjan Pirimqulov osylai dep málim etti, dep habarlaidy QazAqparat.
«Ekologiiaǵa qatysty máseleler qashan da mańyzdy. Tótenshe jaǵdai rejimi – ol máseleni umyta turatyn kezeń emes. Alaida qazirgi tańda iri ónerkásiptik qaýymdastyqtar Ekologiia kodeksin qaraý merzimin basqa ýaqytqa aýystyrýdy surap jatyr. Olardyń negizgi ýáji – koronavirýs pandemiiasynyń saldaryn eńserip alsaq deidi. Qazir bárine de ońai emes. Ony túsinip otyrmyz. Alaida Ekologiia kodeksi men onyń qabyldaný merzimi qazirgi ahýaldy kúrdelendirmeitinin atap ótkimiz keledi», - dedi Ahmetjan Pirimqulov OKQ-da onlain rejimde ótken baspasóz máslihatynda.
Vitse-ministrdiń aitýynsha, Qazaqstanda ekologiia jaǵdaiy óte nashar.
«Keiingi jańalyqtarǵa ǵana qulaq túreiik. Teńizde peshtiń toqtap qalýynan aýaǵa gaz taralyp ketti. Al «Arselor Mittal Temirtaý» kompaniiasyndaǵy jylý elektr ortalyǵynyń shatyrynyń órtenýinen atmosferalyq aýa lastandy. Keiingi bir jyldy alyp qarasańyz, mundai mysaldardy kóptep keltirýge bolady. Sol sebepti ekologiia salasyndaǵy jańa ári qatań talaptardy búginnen bastap engizý kerektigin túsiný kerek», - dedi ol.
