Iran prezidenti sailaýynda osy qyzmette otyrǵan 68 jastaǵy Hasan Roýhani ekinshi merzimge sailandy. Juma kúni ótken sailaý nátijesi boiynsha, daýys berýge qatysqan sailaýshylardyń 58 paiyzǵa jýyǵy – 23 millionnan astamy Roýhanige qoldaý tanytqany týraly búgin Iran ishki ister ministrligi ókili ulttyq telearnadan habarlaǵan.
Bul jolǵy prezident sailaýynda Roýhanige negizgi básekeles bolǵan burynǵy prokýror, qatań saiasatty qoldaityn din qyzmetkeri 56 jastaǵy Ebrahim Raisige 15 millionnan astam sailaýshy daýys bergen. Olarmen birge sailaýǵa túsken qalǵan eki kandidattyń árbiriniń jiǵan daýys sany millionǵa jetpegen.
Iran prezidenti sailaýynyń sharty boiynsha, 50 paiyzdan artyq daýys alǵan kandidat jeńgen bolyp sanalady.
Mamyrdyń 19-y kúni ótken prezident sailaýyna daýys berýge 40 millionnan asa, iaǵni tizimdegi sailaýshylardyń 70 paiyzdan kóbi qatysqan. Bunyń aldynda, 2013 jylǵy sailaýda da sailaýshylar osyndai belsendilik tanytqan bolatyn. Sol jolǵy sailaýda jeńiske jetken Hasan Roýhani Irandy halyqaralyq sanktsiialar qursaýynan bosatýǵa ýáde etken edi. Ol alǵashqy prezidenttik merzimde, 2015 jyly Irannyń iadrolyq baǵdarlamasyn shektep, esesine osy elge salynǵan halyqaralyq sanktsiialardy alyp tastaý týraly AQSh jáne ózge álemdik derjavalardyń Tegeranmen jasasqan kelisiminde negizgi rol atqardy.
Burynǵy prokýror, dini konservator Ebrahim Raisi básekelesi Roýhanidiń álemdik derjavalarmen bekitken iadrolyq kelisimge qarsy. Raisi 1988 jyldyń jazynda myńdaǵan saiasi tutqyndy jazalaǵan «ólim jazasyn shyǵaratyn komissiianyń» múshesi bolǵan.
El azamattary sailaityn Iran prezidenti ishki jáne syrtqy saiasat júrgizý ókilettigine ie atqarýshy bilik basshysy sanalady. Biraq is júzinde Iranda joǵarǵy bilik rýhani jetekshisiniń – 77 jastaǵy aiatolla Áli Hameneidiń qolynda. Ol qarýly kúshterdi, sot júiesin, memlekettik telearnany jáne ózge de mańyzdy úkimettik uiymdardy baqylaýynda ustaidy. Sonymen birge ol eldiń syrtqy saiasatyn belgileidi.
