8 qańtarda Tegeran áýejaiy mańynda "Halyqaralyq Ýkraina áýe jelisiniń" ushaǵyn eki zymyran atyp túsirgen. 14 qańtarda áleýmettik jelide taraǵan videodan sony kórýge bolady. Videonyń feik emestigin New York Times basylymy anyqtady.
Jazbada eki zymyrannyń 30 sekýndtyq úzilispen birinen soń biri ushaqqa tigeni kórinedi. Ushaq áýede órtenip, birneshe minýttan keiin jerge qulaǵan. Borttaǵy barlyq 176 jolaýshy qaza boldy.
Video Islam revoliýtsiiasy saqshylar korpýsy bazasynan birneshe shaqyrym jerde ornalasqan eldimekendegi úilerdiń biriniń tóbesinen túsirilgen. Iran biligi ótken aptada ushaqty zymyranmen atqanyn moiyndady. Tegeran AQSh-tan qarymta shabýyl kútip otyrǵan kezde jolaýshylar ushaǵyn Amerikanyń qanatty zymyrany eken dep qatelesip atyp túsirgen. Reseilik "Tor" zenittik-zymyran kesheninen raketa ushyrylǵan.
Bilik ókilderiniń sózine silteme jasaǵan Irannyń FARS agenttigi seisenbi, 14 qańtarda zymyrannyń ushaqty atyp túsirgenin jariialaǵan birinshi video avtorynyń qamalǵanyn habarlady. Bul video Iran apatty moinyna alǵanǵa deiin internette jariialanǵan. Bul videony Irandaǵy derekkózden alyp, birinshi bolyp taratqan belsendi Nariman Garib Iran biligi basqa adamdy qamaǵanyn jazdy.
