Atom energiiasy jónindegi halyqaralyq agenttik (MAGATE) basshysy Tegeranmen kelissózden keiin Iran BUU inspektorlaryn iadrolyq nysandaryna kirgizýge kelisti, biraq "shekteýli kúide" baqylai alady dep málimdedi. Ótken aptada Tegeran 23 aqpanǵa deiin AQSh sanktsiia kúshin joimasa, MAGATE baqylaýshylaryn Irandaǵy atom nysandaryna kirgizbeitinin aitqan. AQSh pen iadrolyq kelisimge qol qoiǵan Eýropa elderi Irandy bul qadamnan bas tartýǵa shaqyryp, Tegerannyń ýran baiytý týraly jaqyndaǵy málimdemesine alańdaýshylyq bildirgen.
MAGATE basshysy Rafael Grossi eki kúnge sozylǵan kelissózdiń "jaqsy bolǵanyn, aqylǵa qonymdy nátije" bergenin aitty. Grossi Tegeranda saparda bolǵan kezde Irannyń joǵary laýazymdy sheneýnikteri men AQSh biligi ókilderi 2015 jylǵy iadrolyq kelisimge oralý múmkindikteri jaily máseleni ashyq qaldyrǵan.
Irannyń aqparat quraldarynyń habarlaýynsha, syrtqy ister ministri Mohammed Djavad Zarif Tegeran "barlyq taraptar ózderiniń mindetterin oryndasa, ondai kelissózge daiyn" ekenin aitqan. AQSh prezidenti Djo Baidenniń ulttyq qaýipsizdik boiynsha keńesshisi Djeik Sallivan demalys kúni aqparat quraldaryna Iran AQSh ákimshiliginiń kelissóz ústeline oralý týraly usynysyna áli jaýap bermedi dep málimdegen. Sallivan Baiden "irandyqtarmen iadrolyq baǵdarlamaǵa qatań shekteý qoiý máselesin talqylaý úshin kelissóz ústeline otyrýǵa daiyn" dep aitqan. "Bul usynys áli kúshinde, sebebi biz diplomatiia sony júzege asyrýdyń eń úzdik joly ekenine senemiz" dedi Sallivan.
