اتوم ەنەرگيياسى جٶنٸندەگٸ حالىقارالىق اگەنتتٸك (ماگاتە) باسشىسى تەگەرانمەن كەلٸسسٶزدەن كەيٸن يران بۇۇ ينسپەكتورلارىن يادرولىق نىساندارىنا كٸرگٸزۋگە كەلٸستٸ, بٸراق "شەكتەۋلٸ كٷيدە" باقىلاي الادى دەپ مەلٸمدەدٸ. ٶتكەن اپتادا تەگەران 23 اقپانعا دەيٸن اقش سانكتسييا كٷشٸن جويماسا, ماگاتە باقىلاۋشىلارىن يرانداعى اتوم نىساندارىنا كٸرگٸزبەيتٸنٸن ايتقان. اقش پەن يادرولىق كەلٸسٸمگە قول قويعان ەۋروپا ەلدەرٸ يراندى بۇل قادامنان باس تارتۋعا شاقىرىپ, تەگەراننىڭ ۋران بايىتۋ تۋرالى جاقىنداعى مەلٸمدەمەسٸنە الاڭداۋشىلىق بٸلدٸرگەن.
ماگاتە باسشىسى رافاەل گروسسي ەكٸ كٷنگە سوزىلعان كەلٸسسٶزدٸڭ "جاقسى بولعانىن, اقىلعا قونىمدى نەتيجە" بەرگەنٸن ايتتى. گروسسي تەگەراندا ساپاردا بولعان كەزدە يراننىڭ جوعارى لاۋازىمدى شەنەۋنٸكتەرٸ مەن اقش بيلٸگٸ ٶكٸلدەرٸ 2015 جىلعى يادرولىق كەلٸسٸمگە ورالۋ مٷمكٸندٸكتەرٸ جايلى مەسەلەنٸ اشىق قالدىرعان.
يراننىڭ اقپارات قۇرالدارىنىڭ حابارلاۋىنشا, سىرتقى ٸستەر مينيسترٸ موحاممەد دجاۆاد زاريف تەگەران "بارلىق تاراپتار ٶزدەرٸنٸڭ مٸندەتتەرٸن ورىنداسا, ونداي كەلٸسسٶزگە دايىن" ەكەنٸن ايتقان. اقش پرەزيدەنتٸ دجو بايدەننٸڭ ۇلتتىق قاۋٸپسٸزدٸك بويىنشا كەڭەسشٸسٸ دجەيك سالليۆان دەمالىس كٷنٸ اقپارات قۇرالدارىنا يران اقش ەكٸمشٸلٸگٸنٸڭ كەلٸسسٶز ٷستەلٸنە ورالۋ تۋرالى ۇسىنىسىنا ەلٸ جاۋاپ بەرمەدٸ دەپ مەلٸمدەگەن. سالليۆان بايدەن "يراندىقتارمەن يادرولىق باعدارلاماعا قاتاڭ شەكتەۋ قويۋ مەسەلەسٸن تالقىلاۋ ٷشٸن كەلٸسسٶز ٷستەلٸنە وتىرۋعا دايىن" دەپ ايتقان. "بۇل ۇسىنىس ەلٸ كٷشٸندە, سەبەبٸ بٸز ديپلوماتييا سونى جٷزەگە اسىرۋدىڭ ەڭ ٷزدٸك جولى ەكەنٸنە سەنەمٸز" دەدٸ سالليۆان.
