AQSh pen olardyń odaqtastarynyń kúshi shoǵyrlanǵan Iraktaǵy eki áskeri bazaǵa Iran raketalyq shabýyl jasady, – dep habarlaidy "Ult aqparat".
AQSh Qorǵanys ministriniń qoǵammen bailanys boiynsha kómekshisi Djonatan Hoffman málimdemesinde 7 qańtar kúni keshki 17:30 shamasynda Iran áskerileri Irak aýmaǵynda ornalasqan AQSh-tyń áskeri obektileri men áskeri koalitsiialaryna 12-den astam ballistikalyq raketa jibergen. Iran raketalardy Ál Assad jáne Irbid eki áskeri bazasyna baǵyttaǵany anyq. Pentagon ókili qazirgi ýaqytta keltirilgen shyǵyn kólemi eseptelip jatqanyn aitty.
«Sońǵy kúnderi Irannan tóngen qaýip-qaterge jaýap retinde AQSh Qorǵanys ministrligi qyzmetkerleri men seriktesterin qorǵaýdyń barlyq amaldaryn jasap jatyr. Iran rejimi bizdiń kúshterimizge shabýyl jasap, aimaqtaǵy múddemizge qarsy áreketterdi josparlaǵandyqtan, bul eki baza joǵary daiyndyqta boldy. Jaǵdaidy baǵalai otyryp, biz aimaqtaǵy AQSh qyzmetkerlerin, seriktester men odaqtastardy qorǵaý úshin barlyq sharalardy qoldanamyz. Ózgerister bolsa, habardar etip otyramyz», - dep atap ótti Djonatan Hoffman.
Aq úidiń baspasóz hatshysy Stefani Grishem Twitter-degi paraqshasyna AQSh prezidenti Donald Tramp pen onyń keńesshileri jaǵdaidy muqiiat baqylap otyrǵanyn málimdedi.
«Iraktaǵy AQSh bazasyna shabýyl jasalǵany bizge málim. Prezidentke aqparat berdik. Ol jaǵdaidy baqylaýda ustap, óziniń ulttyq qaýipsizdik tobymen aqyldasyp jatyr», - dep málimdedi AQSh prezidentiniń baspasóz hatshysy Stefani Grishem.
Amerikalyq basylymdardyń jazýynsha, AQSh-tyń barlaý qyzmeti Amerikanyń Irak nemese ózge elderdegi nysandaryna shabýyl jasalatynyn aldyn ala eskertken. Ókilder palatasynyń spikeri Nensi Pelosi Twitter-de "Biz áskeri qyzmetkerlerdiń qaýipsizdigin qamtamasyz etip, Tramp ákimshiligi tarabynan qajetsiz arandatý áreketterdi de tyiýymyz kerek, Irannan kúsh qoldanýdy toqtatýyn talap etýimiz qajet" dep jazdy.
Áskeri bazalarǵa shabýyl jasalǵany týraly habar paida bolǵannan keiin Brent markaly munai baǵasy tórt paiyzǵa qymbattady, Amerika naryǵynda munai baǵasy úsh paiyzǵa qymbattady.
Aq úige Qorǵanys ministri Mark Esper men AQSh memlekettik hatshysy Maik Pompeo keldi. BBC irandyq basylymdarǵa silteme jasai otyryp, Islam revoliýtsiiasynyń kúzet korpýsy amerikalyq bazalarǵa Súleimani generaldyń ólimine bailanysty kek alý úshin oq jaýdyrdy dep málimdedi. Amerikalyq bazalarǵa 30-dan asa zymyran ushyrylǵan. Qurban bolǵan adamdar týraly málimet ázirge belgisiz. Iran telearnasy Ál-Asadtaǵy bazany zymyranmen atqylaý sátinen kadrlar kórsetti.
Buǵan deiin habarlanǵandai, CNN telearnasyna bergen ekskliýzivti suhbatynda Islam revoliýtsiiasy joǵarǵy kóshbasshysynyń áskeri keńesshisi Hamenei Hossein Dehgan «Kýds» Islam revoliýtsiiasy kúzet korpýsynyń arnaiy jasaq basshysy, general Kasem Súleimanidiń ólimine bailanysty áskeriler men áskeri obektilerge qarsy qimyldar bolýy múmkin ekenin málimdegen.
