Iran generaly Kasem Súleimanidyń qazasynan keiin Taiaý Shyǵystaǵy jaǵdai shielenisken tusta munai men altyn baǵasy qymbattady, dep habarlaidy Bloomberg agenttigi.
Altyn baǵasy sońǵy alty jyldaǵy eń joǵarǵy kórsetkishke jetti. Onyń bir ýntsiiasy 1576,85 dollardan satyldy. Brent markaly munaidyń bir barelli 70 dollar boldy. AQSh-tyń onjyldyq obligatsiialarynyń kiris kórsetkishi bir bazistik pýnkten asa - 1,77 paiyzǵa deiin tómendegen. Bul investorlardyń osy qundy qaǵazdarǵa suranysy artqanyn baiqatady.
Aita keteiik, Irannyń islam saqshylary korpýsynyń arnaiy elitalyq bólimi – "Quds kúshteriniń" qolbasshysy general Kasem Súleimani 3 qańtar, juma kúni tańerteń Baǵdat áýejaiyna ushyp kelgennen keiin AQSh-tyń áýe shabýylynan qaza tapqan. Bul operatsiia týraly buiryqty AQSh prezidenti Donald Tramp bergen. Pentagon ókilderi Iran generaly Iraktaǵy AQSh diplomattary men áskerine qarsy shabýyldar josparyn ázirleýmen ainalysqan dep málimdedi.
Joǵary shendi áskeri sheneýnikti óltirý Taiaý Shyǵystaǵy jaǵdaidy shielenistirip jiberdi. Irak parlamenti el aýmaǵynan barlyq sheteldik áskerdi shyǵarýdy talap etti. Iran áskeri iadrolyq baǵdarlamasyn qaita qolǵa alatynyn málimdedi. Iran prezidenti Hasan Roýhani bul shabýyldy "terrorlyq akt" dep atap, "Amerika sazaiyn tartady" dep aitty.
