6 qańtarda Tegeranda myńdaǵan adam general Kasem Súleimanimen qoshtasý úshin qala kóshelerine shyqty. «Quds kúshteriniń» qolbasshysy general Súleimani 3 qańtarda Baǵdat áýejaiynda AQSh-tyń áýe shabýyly kezinde qaza bolǵan.
Irandaǵy telearnalardyń barlyǵy Súleimanimen qoshtasý rásimin kórsetti. Al aiatolla Ali Hamenei Súleimanige baǵyshtap quran oqydy.
Qurannan keiin jinalǵandar «Amerikaǵa ólim» dep aiǵailady. Súleimanidiń qyzy ákesiniń ólimi AQSh pen onyń odaqtasy Izrail úshin «qara kún» bolatynyn aitty.
«Aqymaq Tramp, ákemniń ólimimen bári bitti dep oilama» dedi Zeinab Súleimani.
AQSh prezidenti Donald Tramp «eger Tegeran Súleimanidiń ólimine kek qaitarsa, onda Irannyń 52 jerin, mádeni nysandaryn atqylaitynyn» aityp, ses kórsetken.
«Olar bizdiń adamdardy óltiredi, qinaidy. Olar mina qoldanyp, bizdiń adamdardy jaryp jatyr. Al biz olardyń mádeni jerlerine tiispeýimiz kerek eken. Olai bolmaidy» dedi Tramp.
Aita keteiik, Súleimani «Quds kúshteriniń» qolbasshysy retinde sheteldegi, sonyń ishinde Irak, Siriia jáne Iemendegi arnaiy operatsiialardy basqarǵan. Ol 3 qańtarda Baǵdat áýejaiyndaǵy áýe shabýylynan qaza tapqan. Súleimanidyń kózin joiýǵa AQSh prezidenti Donald Tramptyń buiryq bergeni belgili boldy.
Osydan keiin Irak AQSh-tan el aýmaǵyndaǵy áskerin alyp ketýdi talap etken. AQSh prezidenti Tramp Irak elden amerikalyq áskerilerdi shyǵarsa, sanktsiia salatynyn málimdedi.
Bul ýaqytta AQSh memlekettik hatshysy Maik Pompeo da Tegeran Súleimanidiń ólimine kek alýǵa áreket etse, Iran liderleriniń kópshiligi «nysanaǵa» ainalatynyn eskertti. Pompeo Iran ózge elderdegi, iaǵni, Irak, Siriia, Iemen, Livandaǵy áskeri kúshterdi AQSh-qa qarsy soqqy jasaýǵa paidalanatyn bolsa, oǵan aiaýsyz qarymta jasalady degen.
Súleimanidiń ornyna taǵaiyndalǵan general Ismail Kaani qańtardyń 6-si kúni Irannyń memlekettik telearnasyna bergen suhbatynda ese qaitaryp, kek alýǵa ýáde etti.
Ismail Kaani buǵan deiin «Quds kúshteri» elitalyq jasaǵy basshysynyń orynbasary bolǵan.
General Súleimani qańtardyń 7-si kúni týǵan qalasy Kermanǵa jerlenedi.
