Iran biligi narazylyq aktsiialary báseńsip bara jatqanyn málimdep jatyr. Birneshe qalada Islam revoliýtsiiasyn qorǵaý korpýsynyń kúshteri ornalastyrylǵan. Birneshe jerde kóshege shyqqandar men politsiia áli de qaqtyǵysyp jatyr. Resmi habarlama boiynsha, Irannyń batysynda demonstranttarmen qaqtyǵysta qaýipsizdik qyzmetiniń úsh sarbazy qaza tapqan. Úkimetke qarsy sherýler bastalǵannan beri demonstranttar arasyndaǵy adam shyǵyny 20-dan asyp, júzdegen adam tutqyndalǵan.
Iranda jurttyń dinbasylar baqylaityn bilikke qarsy shyǵyp jatqanyna bir apta boldy. Narazylyq Iranda qalyptasqan áleýmettik, ekonomikalyq jaǵdaiǵa qatysty talappen bastalyp, el biligine qarsy urandarǵa ulasty. Iran biligi narazylyq sherýlerin syrtqy kúshter uiymdastyrdy dep biledi.
BUU bas hatshysy Antoniý Gýterrish Irandaǵy narazylyq aktsiialarynda kúsh qoldanýdy toqtatýǵa shaqyrdy. BUU-nyń adam quqyqtary jónindegi joǵarǵy komissary Zeid ál-Hýssein Iran biligin narazylyq tanytyp jatqandardyń quqyǵyn buzbaýǵa úndedi.
AQSh prezidenti Donald Tramp sársenbide narazylyq aktsiiasyna qatysýshylardy qoldap sóz sóiledi. Tramp AQSh-tyń olarǵa «ýaqyty jetkende» kómek beretinin málimdedi. Aqparat agenttiginiń AQSh prezidenti ákimshiliginiń ókilderine silteme jasap habarlaýynsha, Aq úi narazylyq sherýlerin basyp-janshýǵa qatysy bar adamdarǵa qarsy sanktsiia salýy múmkin.
Frantsiia men Germaniia bolsa, Irandaǵy oqiǵalarǵa qatysty ózgeshe ustanym bildirdi. Frantsiia prezidenti Emmanýel Makron Iran biligin azamattardyń beibit túrde qarsylyq bildirý quqyǵyn saqtaýǵa shaqyra otyryp, Tegeranmen dialog ornatýdyń mańyzdy ekenin málimdedi. Ol sonymen qatar AQSh, Izrail jáne Saýd Arabiiasynyń Irandaǵy oqiǵalarǵa qatysty ustanymy men málimdemelerin aiyptady.
