Iran AQSh-pen shartsyz tutqyn almasýǵa daiyn dep habarlady Iran úkimetiniń resmi ókili Ali Rabii. Onyń aitýynsha, Vashington Tegerannyń úndeýine ázirge jaýap bermegen.
"Biz shartsyz barlyq tutqyndy almasýǵa daiyn ekenimizdi habarlaǵanbyz jáne bul máseleni talqylaýǵa daiynbyz, biraq amerikalyqtar ázirge jaýap bermedi" dedi Rabii 10 mamyrda Khabaronline saityna.
Batys aqparat quraldary ótken aptada Tegeran men Vashingtonnyń tutqyn almasý boiynsha kelissóz júrgizip jatqanyn, sonyń nátijesinde amerikalyq ardager teńizshi Maikl Ýaittyń bostandyqqa shyǵýy múmkin ekenin habarlaǵan bolatyn. Irannyń rýhani kósemi aiatolla Áli Hameneige til tigizdi jáne internette jeke aqparatty jariialady dep aiyptalǵan Maikl Ýait naýryz aiynda pandemiia órship turǵan tusta densaýlyǵyna bailanysty bosatylǵan. Iran Amerikanyń keminde tórt azamatyn tutqynda ustap otyr dep aitylady. Al Irannyń málimetinshe, AQSh-ta 20 irandyq azamat túrmede otyr. Naýryz aiynda AQSh memlekettik hatshysy Maik Pompeo Irandy negizsiz ustalǵan barlyq amerikalyqtardy bosatýǵa shaqyrǵan.
5 mamyrda Reuters agenttigi AQSh-tyń jaqyn arada irandyq ǵalym Sirýs Asgaranidi eline deportatsiialaitynyn habarlaǵan. Ony Iranda túrmede otyrǵan Amerika azamattarynyń birine almastyrady.
AQSh pen Iran 2019 jyly tutqyn almasyp, amerikalyq stýdent Siiýe Van bosap shyqqan. Oǵan Iranda tyńshylyqpen ainalysty degen aiyp taǵylǵan. Osy almasý operatsiiasynyń arqasynda "sanktsiia erejesin buzdy" dep aiyptalǵan Iran azamaty Massýd Súleimani bosap shyqqan.
