QR Bilim jáne ǵylym ministriniń keńesshisi Raisa Sher Iraktan qaitarylǵan balalarmen qandai mamandar jumys júrgizip jatqanyn aityp berdi, dep habarlaidy "Ult aqparat".
«14 balanyń 10-y - mektepke áli barmaǵan balalar. Tórteýi – oqýshy. Syrtqy ister ministrligi BǴM men basqa da memlekettik organdardyń kómegimen jasóspirimderdi qaitarý jóninde arnaiy is-áreket josparyn bekitken bolatyn. Qazirgi tańda balalardyń bári Nur-Sultan qalasynyń ómirlik qiyn jaǵdaida qalǵan balalardy qoldaý ortalyǵynda. Ortalyqta balalar úshin barlyq jaǵdai jasalǵan. Meditsinalyq personal tolyq. As máziri, kún tártibi túgel bekitilgen. Balalarmen ártúrli saladaǵy mamandar jumys júrgizedi. Olardyń ishinde psihologtar, tárbieshiler, muǵalimder men áleýmettik qyzmetkerler bar», - deidi Bilim jáne ǵylym ministriniń keńesshisi.
Raisa Sherdiń aitýynsha, kúni keshe Iraktan qaitarylǵan balalardy 15 dáriger tekserip, tiisti protsedýralardy ótkizgen.
«Balalar ortalyqta júgirip oinap, ózderin jaily sezine bastady. Analarymen birge Irakta turǵan balalar esh jerde oqymaǵan. Eshqandai balabaqsha nemese mektepke barmaǵan. Sondyqtan, eki kúnniń ishinde mamandar balalardyń psihologiialyq jaǵdaiyn tekserip, bilimi men daǵdylaryn baqylaidy. Birneshe kúnnen keiin ár balamen jeke jumys isteitin jeke jospar ázirlenedi. Barlyq tiisti protsedýra júrgizilgennen keiin balalardyń bári týystaryna tapsyrylady. Týystary kúni keshe olardy áýejaidan kútip alǵan bolatyn», - dedi ol.
Raisa Sher Iraktan kelgen balalardyń ahýaly týraly aitty.
«Siriiadan oralǵan balalar analarymen birge keldi. Al Iraktan kelgender ata-anasyz qaitty. Sondyqtan, olar ata-ana qamqorlyǵynsyz qalǵan balalar sanatyna jatady. Sol sebepti, biz tezirek barlyq uiymdastyrý protsedýrasyn júrgizip, balalardy týǵan-týystaryna tapsyrýǵa tyrysamyz», - dedi ol.
Ministrdiń keńesshisi balalardyń bári qoǵamǵa beiimdelgennen keiin mektepke, balabaqshalarǵa baryp, jergilikti aýrýhanalarǵa tirkeletinin aityp ótti.
Al Syrtqy ister ministri Erjan Ashyqbaevtyń aitýynsha, Iraktan qaitqan balalar tildi jetik biledi dep aitý qiyn. Qazir olarǵa ortalyqta arnaiy diagnostika júrgiziledi. Jalpy, balalar qazaqsha da, oryssha da túsinedi. Balalardyń analary ómir boiyna bas bostandyǵynan aiyrylǵan.
«Bizdiń resmi derekterge sáikes, Irakta Qazaqstan balalary joq. Jalpy, operatsiiaǵa 57 mln teńge jumsaldy. Bul qarjynyń negizgi bóligi balalardy qaitarýǵa arnalǵan ushaqty jaldaý úshin jumsalǵan. Al endi saýyqtyrý máselesi de, basqa protsedýralar da ortalyq jáne jergilikti memlekettik organdardyń biýdjetimen qarjylandyrylady», - dedi Erjan Ashyqbaev.
Eske sala ketsek, QR Prezidenti Qasym-Jomart Toqaevtyń tapsyrmasy boiynsha júzege asyrylǵan gýmanitarlyq aktsiia nátijesinde Irak túrmesinde óz analarynyń janynda jatqan 14 qazaqstandyq bala qaitarylǵan bolatyn.
