Qazaqstandyq «Altyn adam» animatsiialyq filmi Iordaniiada ótken IV Halyqaralyq balalar kinofestivalinde kórermen kózaiymy júldesin jeńip aldy, dep habarlaidy Ult.kz.
QR Mádeniet jáne aqparat ministrliginiń baspasóz qyzmetiniń habarlaýynsha film QR Mádeniet jáne aqparat ministrliginiń tapsyrysy boiynsha, Ulttyq kinony qoldaý memlekettik ortalyǵynyń qoldaýymen Sh. Aimanov atyndaǵy «Qazaqfilm» kinostýdiiasynda túsirilgen. Rejisserleri – Turdybek Maidan men Tilek Tóleýǵazy, stsenarii avtorlary – Ánnas Baǵdat pen Ularbek Nurǵalym.
Atalǵan festival 15-21 tamyz aralyǵynda Iordaniianyń Koroldik kinokomissiiasynyń uiymdastyrýymen, Jálilá bint Áli hanshaiymnyń qoldaýymen ótti. Baiqaý baǵdarlamasynda Qazaqstan, Qytai, Niderlandy, Latviia syndy elderden kelgen balalar men jasóspirimderge arnalǵan úzdik filmder kórsetildi.
«Altyn adam» filmi otandyq kinoteatrlarda 5 maýsymnan bastap prokatta bolǵan. Týyndyda Han Táńiri shyńyna shyqqan saq jaýyngeriniń sapary baiandalady.
Kartina batyldyq pen erlik, adaldyq pen ar-namys jaiynda. Jobanyń basty maqsaty – balalar men jasóspirimderdi izgilikke baýlyp, rýhani qundylyqtardy boiyna sińirý.
