Soltústik Qazaqstan oblysynda 77 jastaǵy zeinetker internet-alaiaqtardyń qurbany bolyp, 7 million teńgeden astam qarjysynan aiyryldy, dep habarlaidy ult.kz.
Politsiianyń málimetinshe, Petropavl turǵyny Instagram jelisinen investitsiia arqyly joǵary tabys tabý týraly jarnamany kórgen. Usynysqa qyzyqqan áiel silteme arqyly ótip, bailanys málimetterin qaldyrǵan.
Kóp uzamai oǵan ózin investitsiialyq kompaniia qyzmetkerleri retinde tanystyrǵan belgisiz adamdar habarlasqan. Olar qysqa merzimde mol paida tabýǵa bolatynyna sendirip, túrli investitsiialyq jobalarǵa aqsha salýǵa kóndirgen.
Sáýir aiynyń sońy men mamyr aiynyń basy aralyǵynda áiel birneshe ret belgisiz shottarǵa aqsha aýdarǵan. Nátijesinde ol ómir boiy jinaǵan qarajatynyń barlyǵynan aiyrylyp, keltirilgen shyǵyn kólemi 7 million teńgeden asqan.
Aqshany qolǵa túsirgennen keiin alaiaqtar bailanysyn úzgen. Sol kezde ǵana zeinetker aldanǵanyn túsinip, politsiiaǵa júgingen.
Qazir atalǵan fakti boiynsha sotqa deiingi tergeý júrgizilip jatyr. Politseiler aqsha qarajatyn shetelge shyǵarýǵa paidalanylǵan úsh dropperdiń jeke basyn anyqtaǵan. Zań boiynsha jábirlenýshi keltirilgen shyǵyndy azamattyq tártippen óndirýge quqyly.
Quqyq qorǵaý organdary azamattardy kúmándi investitsiialyq usynystarǵa senbeýge, internettegi jarnamalarǵa saqtyqpen qaraýǵa jáne qarjy salýǵa qatysty aqparatty tek resmi derekkózder arqyly tekserýge shaqyrdy.
