Reseide ótken "Golos Deti" án baiqaýynyń daýys berý nátijesin halyqaralyq Group-IB kompaniiasy tekseredi. Bul týraly 29 sáýirde konkýrsty uiymdastyrǵan Pervyi kanal arnasynyń baspasóz qyzmeti habarlady.
Pervyi kanaldyń habarlaýynsha, Interpoldyń seriktesi Group-IB kompaniiasy sms habarlamalar men telefon qońyraýlaryn tekseredi. Telearna tekseris qorytyndysy onlain jariialanatynyn málimdedi.
26 sáýirde Pervyi kanal arnasynda "Golos Deti" shoýynyń finalynda 10 jasar Mikella Abramova (reseilik ánshi Alsý men biznesmen Ian Abramovtyń qyzy) 56,5 paiyz daýyspen jeńiske jetken. Ekinshi oryndy qazaqstandyq Erjan Maksim alǵan.
Osydan keiin reseilik ánshiler men akterler, jeli qoldanýshylary konkýrs nátijesine kóńilderi tolmai, daýys berý nátijesin qaita qaraýdy talap etip jatyr. 27 sáýirde Pervyi kanal teleshoýdyń daýys berý nátijesi tekseriletinin habarlady.
Youtube jelisindegi Mikella Abramovanyń videosyna 45 myńnan astam "dizlaik" basylǵan. 12 myńnan astam kommentarii jazylyp, pikir ieleriniń kóbi daýys berý nátijesin qaita qaraýdy talap etken. Jeli qoldanýshylardyń kóbi jeńiske qazaqstandyq Erjan Maksim laiyq degen pikirler jazyp jatyr.
Aita keteiik, halyqaralyq Group-IB kompaniiasy kiberqylmys pen kibershabýyldardy zertteýmen ainalysady.
