رەسەيدە ٶتكەن "گولوس دەتي" ەن بايقاۋىنىڭ داۋىس بەرۋ نەتيجەسٸن حالىقارالىق Group-IB كومپانيياسى تەكسەرەدٸ. بۇل تۋرالى 29 سەۋٸردە كونكۋرستى ۇيىمداستىرعان پەرۆىي كانال ارناسىنىڭ باسپاسٶز قىزمەتٸ حابارلادى.
پەرۆىي كانالدىڭ حابارلاۋىنشا, ينتەرپولدىڭ سەرٸكتەسٸ Group-IB كومپانيياسى سمس حابارلامالار مەن تەلەفون قوڭىراۋلارىن تەكسەرەدٸ. تەلەارنا تەكسەرٸس قورىتىندىسى ونلاين جارييالاناتىنىن مەلٸمدەدٸ.
26 سەۋٸردە پەرۆىي كانال ارناسىندا "گولوس دەتي" شوۋىنىڭ فينالىندا 10 جاسار ميكەللا ابراموۆا (رەسەيلٸك ەنشٸ السۋ مەن بيزنەسمەن يان ابراموۆتىڭ قىزى) 56,5 پايىز داۋىسپەن جەڭٸسكە جەتكەن. ەكٸنشٸ ورىندى قازاقستاندىق ەرجان ماكسيم العان.
وسىدان كەيٸن رەسەيلٸك ەنشٸلەر مەن اكتەرلەر, جەلٸ قولدانۋشىلارى كونكۋرس نەتيجەسٸنە كٶڭٸلدەرٸ تولماي, داۋىس بەرۋ نەتيجەسٸن قايتا قاراۋدى تالاپ ەتٸپ جاتىر. 27 سەۋٸردە پەرۆىي كانال تەلەشوۋدىڭ داۋىس بەرۋ نەتيجەسٸ تەكسەرٸلەتٸنٸن حابارلادى.
Youtube جەلٸسٸندەگٸ ميكەللا ابراموۆانىڭ ۆيدەوسىنا 45 مىڭنان استام "ديزلايك" باسىلعان. 12 مىڭنان استام كوممەنتاريي جازىلىپ, پٸكٸر يەلەرٸنٸڭ كٶبٸ داۋىس بەرۋ نەتيجەسٸن قايتا قاراۋدى تالاپ ەتكەن. جەلٸ قولدانۋشىلاردىڭ كٶبٸ جەڭٸسكە قازاقستاندىق ەرجان ماكسيم لايىق دەگەن پٸكٸرلەر جازىپ جاتىر.
ايتا كەتەيٸك, حالىقارالىق Group-IB كومپانيياسى كيبەرقىلمىس پەن كيبەرشابۋىلداردى زەرتتەۋمەن اينالىسادى.
