QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin internet sapasynyń qalai tekseriletinin aityp berdi, dep habarlaidy QazAqparat.
«Jalpy búginde bailanys sapasyn qadaǵalaýǵa múmkindik beretin normativtik aktiler bar. Eger signaldyń bir bóligi ustap tursa, standartqa sáikes, bailanys bar ekenin bildiredi. Árine, bul bailanystyń internette sapaly jumys isteýge jáne qyzmetterdi paidalanýǵa jetkiliksiz ekenin túsinemiz. Sondyqtan qazir bizde eki másele bar. Internet sapasyna qoiylatyn naqty talaptar joq jáne el boiynsha qai jerde jaǵdai múshkil, qai jerde internet bar ekeni jóninde saraptama joq», - dedi ministr Ortalyq kommýnikatsiialar qyzmetinde ótken brifingte.
Onyń aitýynsha, internettiń sapasyn baqylaý men máselelerdi sheshý úshin eki jol tańdalǵan. Birinshisi – «Bailanys bar» halyqtyq baqylaý servisi.
«Bul serviste kez kelgen paidalanýshy bir batyrmany basý arqyly bizdiń derekqorǵa jyldamdyq týraly derekterdi tirkei alady. Bul bizge belgili bir aimaqtaǵy derekterdi berýdiń jyldamdyǵy men koordinattaryn beredi. Tiisinshe, osy derekterdiń barlyǵyn jinap, respýblikadaǵy jaǵdaidy baqylap otyrmyz. Servis osylai jumys isteitin bolsa, biz arnaiy qurylǵylarymen álsiz signaldy túzetý men aiyppul salý quqyǵy bar kontrolerlerimizdi qaida jiberý keregin bilemiz. Bul sizderdiń shaǵymdaryńyzǵa jaýap berýge múmkindik beredi jáne aqparat negizinde máseleni joiý boiynsha josparly jumys júrgize alamyz», - dep túsindirdi B. Mýsin.
Sonymen birge, spiker retteýshi rólin odan ári kúsheitý qajettigin atap ótti.
«Pandemiia muny qadaǵalaýsyz qaldyrmaý qajettigin kórsetti. Baqylaýdy kúsheitý úshin internet sapasyna qoiylatyn talaptardy kúsheitemiz. Sondai-aq, radiojiilikterdi bólý standarttary boiynsha da jumys júrgizilýde. Bul bizge latafýndizmmen kúresýge kómektesedi. Úshinshi usynys – aiyppul mólsherin arttyrý. Tórtinshi – turǵyn úi keshenderin optikalyq arnalarsyz paidalanýǵa berýge tyiym salynady. Muny infraqurylymdyq damý ministrligine usyndyq jáne kelise aldyq», - dedi Baǵdat Mýsin.
