Foto: Polisia.kz
Pavlodar oblysy PD esirtki qylmysyna qarsy is-qimyl basqarmasynyń qyzmetkerleri prokýratýramen kelisilgen jedel-tergeý is-sharalarynyń nátijesinde esirtkini internet-dúken arqyly ótkizýmen ainalysqan qylmystyq toptyń áreketine tosqaýyl qoidy, dep habarlaidy "Ult aqparat" Polisia.kz saityna silteme jasap.
Jedel-tergeý toptary Pavlodar jáne Ekibastuz qalalarynyń aýmaǵynda bir ýaqytta arnaiy maqsattaǵy bólimshe jaýyngerleriniń kúshtik qoldaýymen osy qylmystyq bizneske qatysýshylardy ustaǵan.
"Jedel ýákilder Telegram qosymshasyndaǵy internet-dúken arqyly marihýanany satýdy jolǵa qoiǵan uiymdastyrýshyny jáne taǵy da basqa tórt adamdy quryqtady. Olardyń qatarynda býhgalter, internet-dúkenniń ákimshisi, býyp-túiýshi men jasyryp ketýshi bar.
Tórt mekenjai boiynsha júrgizilgen tintý nátijesinde toǵyz keliden astam marihýana, satylymǵa daiyn esirtki, býyp-túiýge jáne qoldanýǵa arnalǵan túrli qurylǵylar, qylmystyq bizneske qatysy baryn rastaityn tehnika men uialy telefondar, sondai-aq internet-dúkenniń qarajat ainalymynyń jazbalary tabylyp, tárkilendi.
Kúdiktiler ustalyp, ýaqytsha ustaý izoliatoryna qamaldy.
QR QK-niń 297-baby 3-bóligi “Esirtki, psihotroptyq zattardy, sol tektesterdi ótkizý maqsatynda zańsyz daiyndaý, qaita óńdeý, iemdený, saqtaý, tasymaldaý, jóneltý ne ótkizý” boiynsha sotqa deiingi is júrgizý bastaldy" - delingen habarlamada.
Tergeý amaldary jalǵasyp jatyr. Tiisti saraptamalar taǵaiyndaldy.
Vedomstvo málimetinshe, uiymdasqan qylmystyq topty qurǵany jáne oǵan qatysqany úshin qylmystyq is qozǵaý josparlanyp otyr.
Esterińizge sala keteiik, adamdar tobynyń aldyn ala sóz bailasýymen, birneshe ret, asa iri mólsherde, elektrondyq aqparattyq resýrstardy paidalaný arqyly jasalǵan bul qylmystar úshin múlki tárkilenip, on jyldan on bes jylǵa deiingi merzimge bas bostandyǵynan aiyrý jazasy qarastyrylǵan.
