Esirtki satatyn internet saittardyń jarnamasy bar graffiti sýreti salǵandar úshin qylmystyq jaýapkershilikke tartylady, dep habarlaidy "Ult aqparat" QR IIM baspasóz qyzmetine silteme jasap.
Ministrlik baspasóz qyzmetiniń málimetinshe, biylǵy jyldyń 11 qańtarynan bastap esirtkini nasihattaityn jáne satatyn internet saittardyń siltemesin taratýǵa bailanysty qylmystyq zańnamaǵa engizilgen ózgerister kúshine enedi.
«Qylmystyq kodekske esirtkini nasihattaý nemese jarnamalaý úshin qylmystyq jaýapkershilik belgileitin jańa 299-1-bap engizildi. Ol boiynsha úsh jylǵa deiin bas bostandyǵynan aiyrý túrindegi jaza kózdelgen.
Eger osy qylmys toppen, birneshe ret, bilim uiymdarynda nemese adam kóp jinalatyn orynda, buqaralyq aqparat quralyn nemese elektrondyq aqparat resýrsyn paidalanyp, qyzmettik jaǵdaiyn paidalanyp jasalsa 3 jyldan 6 jylǵa deiin bas bostandyǵynan aiyrý túrindegi jaza belgilenedi», delingen habarlamada.
Budan basqa birqatar qylmystyq baptarǵa «elektrondyq aqparattyq resýrstardy paidalaný arqyly» degen jańa saralaý belgisi engizildi.
«Bul sharalar esirtkini taratýdyń jańa ádisteri boiynsha jazalaý úshin qajet. Bul degenimiz internet tehnologiiany – saittardy jáne áleýmettik jeli Instagram, Telegram, Facebook, sondai-aq elektrondy tólem júielerin (QIWI, «Iandeks dengi» jáne t.b.) paidalaný», - dep túsindirdi QR IIM Esirtki qylmysyna qarsy is-qimyl departamenti bastyǵynyń orynbasary Nurtai Ábilmájinov.
Atalǵan qylmystar aýyr jáne asa aýyr qylmystar sanatyna jatqyzylǵan. Elektrondy aqparattyq resýrstardy paidalaný arqyly esirtki ótkizý 10 jyldan 15 jylǵa deiin bas bostandyǵynan aiyrýmen jazalanady. Elektrondy resýrstar arqyly esirtki qoldanýǵa kóndirý 3 jyldan 8 jylǵa deiin bas bostandyǵynan aiyrýǵa ákeledi. Olardyń kómegimen esirtki óndirisinde paidalanylatyn zattardyń ainalymy úshin 7 jyldan 10 jylǵa deiin bas bostandyǵynan aiyrýdy kózdeidi.
