Foto:elements.envato.com
Jyl basynan beri telefon jáne internet alaiaqtary qazaqstandyqtarǵa 15 milliard teńge shyǵyn keltirgen. Bul týraly IIM Kiberqylmyspen kúres ortalyǵy basshysynyń orynbasary Rústem Dúisetaev málimdedi, - dep habarlaidy Tengrinews.kz agenttigi.
"Ókinishke qarai, kiberqylmys, sonyń ishinde internet-paidalanýshylarǵa qatysty alaiaqtyq derekteri jiilep ketti. Jyl basynan beri 17,5 myń qylmys tirkelgen, bul byltyrǵymen salystyrǵanda 1,7 paiyzǵa tómen. Alaiaqtardyń áreketi saldarynan azamattar jyl basynan beri 15 milliard teńge kóleminde shyǵynǵa ushyrady", - dedi Dúisetaev QR IIM-de ótken brifingte.
Onyń aitýynsha, onlain-saýda - aldaýdyń keń taralǵan ádisi. Alty aida osyndai jolmen 6 myńǵa jýyq alaiaqtyq jasalǵan. Bankter men mikrokredittik uiymdarda jalǵan onlain nesielerdi tirkeýdiń 2,8 myń faktisi tirkelgen. 1400 jaǵdaida olar ártúrli jobalarǵa – investitsiiaǵa, stavkalarǵa, oiyndarǵa jáne t.b. aqshany tiimdi investitsiialaý degen jeleýmen jasalǵan.
"Fishing siltemelerdi jiberý arqyly azamattardyń shottarynan, onyń ishinde jeke kabinet qurý nemese oǵan qosylý arqyly 1200 alaiaqtyq urlyq jasaldy.
Bank qyzmetkerleri men quqyq qorǵaý organdary atynan qońyraý shalý arqyly alaiaqtyq jasaý erekshe alańdaýshylyq týǵyzady. Jyl basynan beri osy ádispen 3 myńnan asa alaiaqtyq jasalǵan. Mundai jaǵdailarda alaiaqtar abonenttik nómirdi ózgertý úshin arnaiy qyzmetterdi belsendi paidalanady. Iaǵni, ornatylǵan baǵdarlamanyń kómegimen shynaiy abonenttik nómir basqaǵa aýystyrylady.
Azamattardy qolda bar múlkin – páterdi, kólikti kepilge qoiýǵa nemese satýǵa kóndirý, túsken aqshany "seif" dep atalatyn esepshotqa salý jaǵdailary tirkeldi. Keiinirek olar basqa tólem júieleri arqyly aqshany nemese aýdarymdardy qolma-qol aqshaǵa ainaldyrý úshin paidalanyldy", - dedi Dúisetaev.
Ol mundai qylmystar 190-baptyń 2-bóligi – "Aqparattyq júieni paidalanýshyny aldaý nemese senimin teris paidalaný jolymen jasalǵan bótenniń múlkin urlaý nemese bótenniń múlkine quqyqty aldaý nemese senimge qiianat jasaý arqyly alý" dep túsindirdi. Onda múlkin tárkileýmen 4000 AEK aiyppuldan 4 jylǵa deiin bas bostandyǵynan aiyrý jazasy qarastyrylǵan.
Qylmystyq toppen nemese asa iri kólemde jasalǵan jaǵdaida 5 jyldan 10 jylǵa deiin bas bostandyǵynan aiyrý jazasy qarastyrylǵan.
