Depýtat Amanjan Jamalov sońǵy jyldary Qazaqstan innovatsiialyq tehnologiialarǵa qyrýar qarjynyń retsiz jumsalyp jatqanyn aitty, dep habarlaidy QazAqparat tilshisi.
Májilis depýtaty atalǵan suraq boiynsha QR Premer-Ministrine depýtattyq saýal joldady.
«Memleket basshysy óziniń sońǵy Joldaýynda jańa tehnologiialardyń engizilýine erekshe mán berdi. Eske salaiyn, 2013 jyly QR innovatsiialyq damýynyń 2020 jylǵa deiingi tujyrymdamasy bekitilgen bolatyn. Memlekettik baǵdarlamanyń ekinshi besjyldyǵyna qarai, shynynda da innovatsiialyq damýǵa qol jetkizemiz degen boljam bar edi. Ókinishe qarai, olai bolmady. Aýqymdy biýdjettik shyǵynnyń esebinen jasalǵan innovatsiialyq qurylym ózin-ózi aqtamady», - deidi depýtat saýalynda.
Onyń aitýynsha, «Innovatsiialyq tehnologiialar parki» Arnaiy ekonomikalyq aýmaǵynda 2020 jylǵa deiin 250-350 mln AQSh dollarlyq sheteldik investitsiia tartý mindeti júktelgen.
«Osy tapsyrmanyń aiaqsyz qalǵanyna kimniń jaýapty ekeni túsiniksiz. AEA ITP-niń qurylymyna ǵana biýdjettiń 20 mlrd teńgesi ketti. Bizdegi parkti birdei qaǵidat boiynsha jumys júrgizetin Belarýstaǵy joǵary tehnologiialardyń parkimen salystyryńyz. Ol eldegi park qazirgi tańda baǵdarlamalyq ónimder men IT-qyzmetteriniń jahandyq eksporterine ainalyp úlgerdi. 2017 jyly atalǵan parktiń eksporty (192 kompaniia) 1 mlrd dollar kiris ákelgen. 100 mln AQSh dollaryna jýyq tikelei shetel investitsiiasy tartylǵan. Qazaqstan tipti mundai kórsetkishke jaqyndaǵan da joq», - deidi depýtat.
Májilismen sondai-aq, 2011 jyly qurylǵan TDJUA (Tehnologiialyq damý jónindegi ulttyq agenttik» AQ) 11,5 milliard teńgege 316 innovatsiialyq grant bólgenin jetkizdi.
«Nátije baiqalmaidy. Osyǵan qaramastan, 2017 jyly «TDJUA» AQ-qa 3,7 mlrd teńge bólindi. 2018 jyly taǵy 0,8 mlrd teńge bólý qarastyrylǵan. Jańa innovatsiialyq ortalyq ashýǵa bizdiń ekinshi múmkindigimiz joq. Sondyqtan, tájiribedegi sátsizdikterdi esepke ala otyryp, úzdik álemdik tájiribelerdi eskerý kerek. Birinshiden, IT-saktory úshin jeńildikterdi keńeitip, ekinshiden, jańa innovatsiialyq ortalyq ashý kezinde maqsatty tiimdilik kórsetkishterin ázirlep shyǵý kerek», - deidi ol.
