Búgin Úkimettiń selektorlyq rejimdegi otyrysynda QR Premer-Ministri Baqytjan Saǵyntaev Atyraý oblysyndaǵy infliatsiiany tejeý jumystaryna kóńili tolmaityndyǵyn ashyq aitty, dep habarlaidy QazAqparat.
«2017-2018 jyldardyń saqtandyrý qorlarynan óńirlik turaqtandyrý qoryna biylǵy jyly 1255 tonna kartop jáne kókónis ónimderin satyp alýǵa sheshim qabyldanyp, aǵymdaǵy jyldyń qazan aiynda tasymaldaý josparlanyp otyr. Qazirgi tańda turaqtandyrý qorynda 575500 dana jumyrtqa ónimderi saqtalýda. Memorandým negizinde áleýmettik mańyzy bar azyq-túlik taýarlaryna tutyný baǵalary indekstik deńgeide qazan aiynda 109 paiyz bolady dep boljanýda», - degen edi Atyraý oblysy ákiminiń orynbasary Álibek Naýtiev.
«Baiandamańyz jaqsy. Biraq infliatsiialyq eń joǵary 6 paiyzdyq kórsetkish Atyraý oblysynda. Sebebin nege aitpadyńyz? Respýblika boiynsha eń joǵary kórsetkishtiń sebebi nede?», - dep surady Úkimet basshysy Atyraý oblysy ákiminiń orynbasarynan. Óz kezeginde Álibek Naýtiev Atyraý oblysyndaǵy infliatsiialyq kórsetkishtiń joǵary bolýyna dollar qunynyń artýyna bailanysty dep aqtalýǵa tyrysty. «Dollar búkil Qazaqstan boiynsha birdei ǵoi. Jaqsy jumys joq degen sóz», - dep túiindedi sózin Baqytjan Saǵyntaev.
Aita keteiik, otyrysta Ulttyq ekonomika ministri Timýr Súleimenov jyldyń basynan beri óńirlerdiń kóbinde infliatsiia salystyrmaly tómen deńgeide tirkelgenin aitqan bolatyn «5 óńirde infliatsiia ortasha respýblikalyq deńgeiden joǵary qalyptasty. Olar: Atyraý, Soltústik Qazaqstan, Pavlodar, Ońtústik Qazaqstan oblystary jáne Astana qalasy», - degen edi Timýr Súleimenov.
