Álemdegi geosaiasi jaǵdaiǵa bailanysty infliatsiia aitarlyqtai ósken. Bul týraly QR Ulttyq bankiniń tóraǵasy Ǵalymjan Pirmatov málim etti, dep habarlaidy QazAqparat.
«Infliatsiia geosaiasi jaǵdaiǵa bailanysty aitarlyqtai ósti. Búginde álemde jáne elimizde baǵalardyń ósýi jáne infliatsiialyq qysymnyń artqanyn baiqap otyrmyz. Mundai jaǵdaida infliatsiianyń jyldyq ósýi 12%-ǵa deiin kótereledi. Sebebi baǵanyń ósýi barlyq salada baiqalyp otyr. Bastapqy kezde qubylmalylyǵy shamaly jáne tek orta merzimdi kezeńde ǵana tómendeitin infliatsiianyń eleýli túrde óskenin baiqaimyz. Muny 2022 jylǵy naýryzda bazalyq infliatsiiaǵa berilgen ártúrli baǵalaý aiǵaqtaidy. Qazir infliatsiiaǵa qatysty boljamdar joǵary jáne turaqsyz bolyp otyr», - dedi Ǵalymjan Pirmatov Ulttyq bankte ótken baspasóz máslihatynda.
Onyń aitýynsha, bazalyq mólsherlemeni kóterý, infliatsiianyń ósý úrdisine jol bermeý jolyndaǵy qajetti shara.
«Biyl naýryzda respondentter arasynda júrgizilgen saýalnama qorytyndysy halyq seniminiń tómendep, infliatsiialyq kútýlerdiń birshama artqanyn kórsetti. Infliatsiiany sandyq baǵalaý 2022 jylǵy naýryzda 11,4%-dy kórsetti. Osyǵan bailanysty júrgizilip otyrǵan saiasatqa jáne onyń infliatsiia boiynsha málimdelgen maqsatqa jetý qabiletine halyqtyń senimin arttyrý Ulttyq banktiń basym mindeti bolyp qala beredi. Bul úshin aqsha-kredit saiasaty infliatsiiany nysanaly baǵdar deńgeiine deiin tómendetýge negizdelýi kerek», - deidi ol.
