2026 jylǵy shildedegi qorytyndy boiynsha jyldyq infliatsiia 10,2%-ǵa tómendep, bir aidaǵy baǵanyń ósýi 0,6%-dy kórsetti. Bul aldyńǵy eki jyldaǵy shildedegi kórsetkishten tómen (2025 jáne 2024 jylǵy shildede 0,7%), dep habarlaidy ult.kz.
Infliatsiianyń báseńdeýine Úkimettiń Ulttyq bankpen jáne Qarjy naryǵyn retteý jáne damytý agenttigimen birlesip, baǵa serpinin tejeýge, makroekonomikalyq turaqtylyqty qamtamasyz etip, halyqtyń ál-aýqatyn arttyrýǵa arnalǵan sharalar keshenin iske asyrýy yqpal etti.
Azyq-túlik taýary baǵasynyń ósý qarqynynyń tómendeýi de infliatsiiany báseńdetýge basty úles qosýda. Shildede jyldyq azyq-túlik infliatsiiasy 10,1%-ǵa baiaýlasa, áleýmettik mańyzy bar azyq-túlik taýary baǵasynyń ósýi nebári 2,4% boldy. Bul bir jyl burynǵyǵa qaraǵanda, 7 paiyzdyq tarmaqqa tómen (9,4%).
Mundai nátije áleýmettik mańyzy bar azyq-túlik taýary tizbesin 19-dan 31 túrge deiin arttyryp, shekti 15% saýda ústemesiniń saqtalýyn turaqty baqylaýdy, nátijesiz deldaldardy anyqtap, qysqartýdy, ishki naryqty otandyq ónimmen qanyqtyryp, azyq-túlik taýaryna qol jetkizýdi qamtamasyz etýdi qamtityn sharalar kesheni arqyly júzege asyryldy.
Bul rette JJM naryǵyn dáiekti yryqtandyrýǵa jáne retteletin kommýnaldyq qyzmet tarifiniń ósýine moratoriidiń aiaqtalý faktorynyń yqpalyna qaramastan, jalpy infliatsiianyń báseńdeýi saqtalyp otyr. Osy faktorlar, eń aldymen, baǵanyń shildedegi jyldyq ósýi 11,7% bolǵan azyq-túlik emes taýarlar qunyna qysym jasaýdy jalǵastyrýda.
