QR Indýstriia jáne infraqurylymdyq damý ministrligi jolaýshylar vagonyn satyp alý úshin 2019 jyldyń naqtylanǵan biýdjetinen 18,7 mlrd teńge bólýdi surap otyr. Bul týraly búgin 2019 jylǵa arnalǵan respýblikalyq biýdjet týraly Zańǵa úkimettik naqtylaýlardy talqylaý barysynda atalǵan vedomstvonyń vitse-ministri Berik Kamaliev aitty, dep habarlaidy "Ult aqparat".
«Qazaqstanda 2246 jolaýshylar vagony bolsa, sonyń búginde 46 paiyzynyń tozyǵy jetken. Bul vagondar jaramdylyq merzimine bailanysty qoldanystan alynýy tiis. Al biz olardy kúrdeli jóndep, qalpyna keltirý jumysymen ainalysyp jatyrmyz. 2018 jyly ǵana emes 2017 jyly da «Qazaqstan damý banki lizing» arqyly 30 mlrd teńge somaǵa vagondar satyp alyp, aqshasyn tóledik jáne qazirgi ýaqytta bul 63 vagondy aldyq. Vagondar «Aqtóbe-Mańǵystaý» baǵytynda júredi. Olardyń barlyǵy Tver qurylys zaýytynan shyqqan. Olar bizge jaqsy jeńildik usynady. Al búgingi naqtylaýda biz «QDB lizing» arqyly taǵy da 18,7 mlrd teńge surap otyrmyz», - dedi vitse-ministr.
Onyń aitýynsha, naqtylanǵan biýdjette ministrlik usynysy qabyl alynyp, 18,7 mlrd teńge bólinetin bolsa, onda atalǵan qarajatqa jolaýshylar vagony satyp alynady. Vagondar «Almaty-Mańǵystaý», «Aqtóbe-Mańǵystaý» jáne Nur-Sultan-Saryaǵash» baǵyttarynda jolǵa shyǵarylady. Osylaisha atalǵan baǵyttaǵy jolaýshylar vagonynyń tapshylyǵy joiylady.
