Osy aptada Indoneziiany dúr silkindirgen jer silkinisi qurbandarynyń sany 56 adamǵa deiin artty, dep habarlaidy Reuters agenttigi.
Juma kúni Dúlei apattardyń saldaryn azaitý agenttigi (BNPB) Indoneziianyń Batys Sýlavesi provintsiiasynda bolǵan eki jer silkinisinen 42 adam qaza tapqanyn habarlaǵan bolatyn. Birinshi jerasty dúmpýi – 6,2 ball, ekinshisi 5,9 ball qýatymen boldy.
BNPB málimetteri boiynsha, 6,2 baldyq alǵashqy jer silkinisinen keiin 820-dan astam adam jaraqat alyp, 15 myńǵa jýyǵy úilerin tastap shyǵýǵa májbúr boldy. Kýágerlerdiń aitýynsha, keibireýler taýlardan pana izdegen, al basqalary evakýatsiialyq ortalyqtarǵa barǵan.
Zilzala epitsentri Sýlavesi aralynyń batysyndaǵy Mamýdjý qalasynyń mańynda ornalasqan. Jerasty dúmpýleri adamdar uiqyǵa ketken ýaqytta, túnde bolǵan. Bul faktor zardap shekkenderdiń kóp bolýyn túsindiredi.
