Indettiń taralýyn toqtatpasaq, jaǵdaidy ýshyqtyryp alamyz. Bul týraly búgin Memleket basshysy Qasym-Jomart Toqaev Tótenshe jaǵdai rejimin qamtamasyz etý jónindegi memlekettik komissiianyń otyrysynda aitty, dep habarlaidy "Ult aqparat".
«Koronavirýs pandemiiasynyń zardabyn búkil dúnie júzi tartyp otyr. Bul indet bizdiń elimizdiń ekonomikasyna da teris yqpalyn tigizýde. Sondyqtan, qazirgi tańda osy daǵdarysqa qarsy naqty sharalar qabyldap otyrmyz. Jalpy, búkil álem koronavirýsqa qarsy kún saiyn emes, saǵat saiyn kúres júrgizip jatyr. Álem jurtshylyǵy aityp otyrǵandai, bul daǵdarys – Ekinshi dúniejúzilik soǵystan keiin bolyp turǵan eń aýqymdy jáne asa qaýipti alapat. Men óz sózimde aityp óttim. Biz karantin sharalarynyń arqasynda virýstyń jappai taralýyn báseńdettik. Tutastai alǵanda, jaǵdai baqylaýda», - dedi Q.Toqaev.
Memleket basshysy atap ótkendei, elorda men Almatydaǵy qazirgi jaǵdai turaqty.
«Biraq, Qaraǵandy, Aqmola, Qyzylorda, Túrkistan, Jambyl oblystarynda aýrýǵa shaldyqqandardyń sany kúrt ósip ketti. Bul atqarylǵan jumystardyń jetkiliksizdigin jáne qosymsha sharalar qabyldaý qajet ekenin kórsetedi. Ońtústik – halyq tyǵyz ornalasqan óńir. Sondyqtan indettiń taralýyn toqtatpasaq, jaǵdaidy ýshyqtyryp alamyz. Oǵan qosa, kóktemgi egis naýqany bastaldy. «Jumyspen qamtý jol kartasy» boiynsha birqatar jobalar qolǵa alynady. Osyndai ýaqytta eldegi epidemiologiialyq ahýalǵa airyqsha nazar aýdarýymyz kerek. Bul – asa mańyzdy mindet», - dedi Prezident.
Aita keteiik, Memleket basshysy eldegi tótenshe jaǵdai rejimin sáýir aiynyń sońyna deiin sozý qajet ekendigin jáne úsh megapolis pen óńirlerdegi karantindi jalǵastyrýdy tapsyrdy.
