Memleket basshysynyń baspasóz hatshysy Berik Ýáli Facebook-tegi paraqshasynda elimizdegi tótenshe jaǵdai kezindegi ahýal men Qasym-Jomart Toqaevtyń 31 naýryz kúni málimdemesindegi mindetter jáne osy kezdegi árbir azamattyń mindeti haqynda óz pikirin bildirdi, dep habarlaidy "Ult aqparat".
INDET pen MINDET
Aldymen indet týraly
Koronavirýs pandemiiasy jer júzindegi pende bitkenniń barlyǵy birdei ekenin, eshkimniń eshkimnen aiyrmashylyǵy joqtyǵyn kózimizge shuqyp kórsetti. Bai men kedei de, patsha men paqyr da, aq pen qara da indettiń aldynda birdei. Bólmeidi, jarmaidy. Kim ekenińe qaramaidy. Emi tabylmaǵanymen qoimai, shekara degen túsinikke baǵynbaidy. Elden elge, jerden jerge erkin kóship júre beredi. Jolyndaǵysynyń bárin jalmap bara jatyr. Indetti juqtyrmaýdyń, jaqyndaryńdy aman saqtaýdyń tóte joly tynysh qana úiińde otyrý ekenin túsinýimiz kerek. Túsinip te kele jatyrmyz. Jái júrmei aýrý tasyp, ózińniń de, ózgeniń de basyn qaterge tikpeiik desek, shańyraǵymyzdan shyqpaýymyz qajet. Kelin túsirip, qyz uzatyp, as berip jinala bersek, onda munyń aldyn alý, jolyn bógeý múmkin emes. Elimizde Tótenshe jaǵdai bekerden-beker engizilgen joq. Tártipke baǵyný, saqtaý shart. Sondyqtan ózimizge ózimiz jaý bolmasaq, úiden shyqpaiyq, otbasymyzdy, halqymyzdy saqtaiyq.
Endi mindet jaiynda
Tótenshe jaǵdai dedik. Qazaqstan TMD elderiniń arasynda qatań tártipti birinshi bop qolǵa aldy. Tótenshe jaǵdai jariialandy. Qalalar karantinge jabyldy. Nur-Sultan men Almatyda karantinniń talaptary kúsheitildi. El bárinen habardar.
Bul sharalardyń saldarsyz emes ekeni de anyq. Qanshama adam jumystan shyǵyp qalyp, kásiporyndar jumystaryn toqtatyp jatyr. Jumyssyz qalmaǵany aqysyz demalysqa jiberildi. Ekonomikalyq turǵydan óte aýyr kezeńdi bastan ótkerip otyrmyz. Daǵdarystyń salqyny eshkimdi ainalyp ótip jatqan joq. Mundai syn saǵatynda memleket óz azamattaryna qamqorlyq jasaýǵa mindetti. Taryqpaýyn qamtamasyz etýi kerek. Sol sebepti Memleket basshysy Qasym-Jomart Toqaev 31 naýryz kúni málimdeme jasady. Málimdememen jurt tanysty, qandai máselelerdiń aitylǵanynan habardar dep oilaimyn. Sonda da bolsa keibir tustaryna toqtala keteiin.
• Tótenshe jaǵdaiǵa bailanysty tólenetin 42 500 teńge kólemindegi qarajat buryn turaqty jumys istep, jalaqy alǵandarǵa ǵana emes, sondai-aq ózin ózi jumyspen qamtyǵan jáne resmi tirkelmei eńbek etetin azamattarymyzǵa da beriletin boldy.
• Turmysqa qajetti zattar men azyq-túlikti tegin alatyn azamattardyń sanaty keńeiedi. Osynyń arqasynda 800 myńnan astam adamǵa kómek kórsetiledi.
• Shaǵyn jáne orta biznes ókilderi 6 aiǵa (biylǵy 1 sáýirden 1 qazanǵa deiin) eńbekaqy tóleý qorynan ustalatyn salyqtan jáne basqa da tólemderden bosatylady.
Memleket basshysy qol qýsyryp qarap otyratyn kez emes ekenin biledi. Sondyqtan osyndai naqty sharalar qabyldanyp jatyr. Munyń barlyǵy áleýmettiń áleýmettik jaǵdaiynyń álsirep ketpeýine, daǵdarystyń saldaryn jeńildetýge, eldegi ekonomikalyq turaqtylyqty saqtaýǵa kómek bolady, septigin tigizedi. Iaǵni, memleket ózine júktelgen mindetti oryndap jatyr deýge tolyq negiz bar.
Árbir azamattyń mindeti haqynda
Tótenshe jaǵdaidyń qai kezde engiziletinen qalyń jurt habardar ǵoi dep oilaimyn. Kóbine soǵys jaǵdaiynda. Aitqan jerden aýlaq, elimizdiń sheti bútin, ishi beibit. Degenmen myna indettiń shyǵyny soǵyspen para-par bolýy múmkin. Qazir kózimiz kórip, qolymyz ustamasa da maidandaǵydai áreket júrip jatyr. Ásirese, dárigerler kúnmen, túnmen sanaspai árbir aýrý juqtyrǵan adamnyń janyn aman alyp qalý úshin aiqasýda. Bir adam koronavirýs juqtyrsa, ainalasyndaǵy júzdegen kisige qater tóndiredi. Myltyq kezenbei-aq, oq atpai-aq adamdar óziniń salǵyrttyǵynan, jaýapsyzdyǵynan qanshama azamattyń basyna náýbet ákeledi. Maidan degen de biz osyny da meńzep otyrmyz. Sol sebepti árbir kisi maidanda júrgendei jaýapkershilikti sezinýi kerek. Áitpese, nemqurailylyq ókindirip tyndyrýy múmkin.
Kúni keshe bizge kóp nárse kerek edi, kóp dúniege kóńilimiz tolmaityn. Prezidenttiń baspasóz hatshysy retinde emes, shtativ arqalap, siýjet jasap eldiń arasynda júrip jetilgen jýrnalist retinde qoǵamdaǵy pikirlerdiń bárinen habardar ekenimdi aitqym keledi. Tirshilikte barlyǵy qajet, kóńil tolmastyq bolady. Ol qalypty dúnie. Al qazir she? Qazir bizge bir ǵana nárse kerek. Ol - amandyq. Árbir qazaqstandyq pen tutas halqymyzdyń, jalǵyz Otanymyzdyń amandyǵy qajet. Prezidentimiz de halyqqa jasaǵan ár málimdemesinde osyny qaitalap aitýda. Amandyq bolmasa, aýrý shalsa, eshteńeniń kerek bolmai qalatynyn anyq túsindik. Ásirese, mynadai almaǵaiyp, qysyltaiań, syndarly shaqta bir-birimizden kemshilik izdemei, min termei, súrinip ketse, tabalamai, aiaqtan shalmai, aram oilamai, qaita birimizdi birimiz qoldap, qamqorlyq tanytyp, járdem jasap, qoltyǵymyzdan demep, birlik kórseteiik.
Ádette biz ózimizge ózgeni mysal retinde keltirýge qumarmyz ǵoi. Amerikada tornado, Japoniiada tsýnami bolyp, sonyń saldarymen búkil el jumylyp kúresip, bir-birine járdemdesip jatqanda ózimizge úlgi etemiz. «Mine, el degen osyndai bolý kerek» dep jatamyz. Biz qashanǵy ózgeni zor sanai beremiz? Nege qaita basqaǵa biz úlgi bolmaimyz?!
Eldigimizdi, tutastyǵymyzdy tanytaiyq. Alaqandai jerdegi at tóbelindei ǵana halyqpyz ǵoi. Alataidai búlinbei, «sen-men» dep bólinbei, myna synaqtan barlyǵymyz bir úidiń balasyndai, bes saýsaqtyń salasyndai birigip óteiik. Bizdiń aldymyzda turǵan basty mindet osy. Eldiń de, erdiń de synalatyny osy shaq. Synalǵan sátte syr berip qalmaiyq, aǵaiyn!
