Kez kelgen uly is, kishkentai qadamdardan bastalady. Eń bastysy – birinshi qadamdy jasaý. Búgin «Qaiyrymdy ister marafonynyń» bastalýyna arnalǵan is-sharada Aqparat jáne qoǵamdyq damý ministri Aida Balaeva osylai aitty, dep habarlaidy QazAqparat.
«Búgin aitylǵan barlyq igi bastamalardy óńirlerdiń ary qarai jalǵastyrýy mańyzdy. Indet kezinde el halqynyń jaqsy igi isterdiń janynan tabylatyny aiqyn kórindi. Bizdiń úlken ult retinde qalyptasqanymyzdy kórsetti. Táýelsizdiktiń eń basty qundylyǵy da, basty maqsaty da osy shyǵar. Sondyqtan indet kezinde halqymyz óziniń boiyndaǵy keremet qasitetterdi tanyta aldy. Osy oraida bir-birimizge degen qamqorlyqty, qaiyrymdylyqty, sondai-aq eń bastysy, birlese jumys isteýdi úlken jaqsy jolǵa qoidyq», - dedi ministr «Qaiyrymdy ister marafonynyń» bastalýyna arnalǵan is-sharada.
Bul turǵyda ol Aqparat jáne qoǵamdyq damý ministrligi qoǵamdyq institýttarymen tyǵyz qarym-qatynasta jumys isteýge daiyn ekenin atap ótti.
«Jalpy igi is-sharalardyń basynda birge bolaiyq. Biyl da «Biz birgemiz» uranyn ary qarai jalǵastyryp, birge jumys isteiik. 2020 jyl tiisti nátijelerdi kórsetti ǵoi, volonterlik uiymdardyń sany artty. Bul turǵyda ár baǵytta eriktiler óz jumysyn kórsete aldy. Sondyqtan búgingi is-sharanyń baǵyttary keńeiedi dep senemin. Osy oraida jańa tulǵalardy kóremiz dep senemin», - dedi A. Balaeva.
