Foto: Almaty ákimdigi
Almatyda qala ákimi Darhan Satybaldynyń tóraǵalyǵymen kógaldandyrý júiesin jetildirý jáne jeke tálimbaq qurý máselesine arnalǵan keńes ótti.
Jiynda qaladaǵy qurylys pen kóriktendirý qarqynyn eskere otyryp, jyl saiyn kóshetke degen suranys 1,4 millionnan asatyny aityldy. Buǵan aǵashtar men butalar otyrǵyzý, sondai-aq jasyl jelekti qalpyna keltirý jumystary kiredi. Qazirgi tańda Almatyda arnaiy tálimbaqtyń bolmaýy syrtqy jetkizýshilerge táýeldilikti kúsheitip, kóshetterdiń baǵasy men jersiný sapasyna áser etip otyr.
Qala basshysy óz tálimbaq bazasyn qalyptastyrý kógaldandyrý salasyn turaqtandyryp, qalalyq ortanyń sapasyn arttyrýdaǵy mańyzdy strategiialyq qadam ekenin atap ótti.
Joba aiasynda qalanyń ońtústik bóliginde birneshe ýchaskede tálimbaq ornalastyrý qarastyrylýda. Sonymen qatar aýmaqty keńeitý múmkindigi pysyqtalyp jatyr. Bul Almatyny klimatqa beiimdelgen kóshetterdi ósirip, importqa táýeldilikti azaitýǵa múmkindik beredi.
Sondai-aq, zamanaýi agrotehnologiialardy engizý máselesi de nazarda. Atap aitqanda, jylyna 1 millionǵa deiin kóshet ósirýge múmkindik beretin mikroklondyq kóbeitý zerthanasyn qurý josparlanyp otyr. Bul sapaly otyrǵyzý materialymen turaqty qamtamasyz etip, shyǵyndy azaitýǵa yqpal etedi.
Keńes barysynda jobaǵa sheteldik investorlardyń qyzyǵýshylyq tanytyp otyrǵany da belgili boldy. Qazirgi tańda seriktestik tetikteri men investitsiia tartý joldary qarastyrylyp jatyr.
Jiyn sońynda Almaty ákimi Darhan Satybaldy jaýapty basqarmalarǵa jobany keshendi túrde iske asyrýdy, sonyń ishinde jobalyq sheshimderdi naqtylaýdy, ǵylymi bazany damytýdy jáne óndiristik qýatty kezeń-kezeńimen iske qosýdy tapsyrdy.
Bul bastama qaladaǵy jasyl qordy júieli jańartýǵa, ósimdikterdiń jersiný deńgeiin arttyrýǵa jáne 2030 jylǵa deiingi kógaldandyrý josparlaryn tiimdi júzege asyrýǵa múmkindik beredi.
Foto: Almaty ákimdigi
Foto: Almaty ákimdigi
Foto: Almaty ákimdigi
Foto: Almaty ákimdigi
