Qazaqstan álemniń eń básekege qabiletti ekonomikalarynyń halyqaralyq reitinginde 38-orynǵa turaqtap, TMD elderi ishinde bul tizimge engen jalǵyz memleket atandy. Bul týraly IMD World Competitiveness Center jariialaǵan jahandyq zertteý qorytyndysynda aitylǵan, dep habarlaidy ult.kz.
Shveitsariialyq IMD World Competitiveness Center ortalyǵynyń jyl saiynǵy zertteýi álemniń 70 eliniń ekonomikasyn ekonomikalyq ónimdilik, memlekettik tiimdilik, biznes tiimdiligi jáne infraqurylym siiaqty tórt negizgi baǵyt boiynsha baǵalaidy. Biylǵy tizimde Qazaqstan 65.4 upai jinap, 38-orynǵa ie boldy.
Reitingtiń kósh basynda Singapýr (100 upai), Gonkong (95.6 upai), Shveitsariia (95.3 upai), Taivan (94.3 upai), BAÁ (94.1 upai), Daniia (94.1 upai), Irlandiia (94.1 upai), Niderland (90.1 upai), Shvetsiia (88.5 upai) jáne AQSh (86.8 upai) siiaqty álemniń aldyńǵy qatarly 10 elderi ornalasqan.
Osy jahandyq tizimde Qazaqstan óziniń kórsetkishteri arqyly Ispaniia, Portýgaliia, Polsha, Italiia jáne Argentina syndy birqatar memleketterdi artta qaldyryp, joǵary satyǵa turaqtady.
Eldiń jeke profailynda negizgi tórt baǵyt boiynsha mynadai kórsetkishter tirkelgen: Memlekettik tiimdilik (Government Efficiency) boiynsha Qazaqstan 63.0 upai jinap, 23-orynǵa turaqtady.
Al Biznes tiimdiligi (Business Efficiency) baǵytynda 66.5 upaimen 23-oryndy ielendi.
Sonymen qatar Infraqurylym (Infrastructure) kórsetkishi 46.2 upaidy qurap, el bul salada 43-orynǵa jaiǵasty, al Ekonomikalyq kórsetkishter (Economic Performance) baǵyty boiynsha 43.5 upaimen 57-orynǵa turaqtap otyr.
Zertteý aiasynda Qazaqstannyń negizgi makroekonomikalyq kórsetkishteri de usynylǵan: Jalpy ishki ónim (JIÓ) kólemi 306.2 milliard dollardy qurap, el bul kórsetkish boiynsha 44-orynǵa ie boldy.
JIÓ (TSQ) jan basyna shaqqanda 45,286.3 dollarǵa jetip, 43-oryndy enshiledi. Eldiń naqty JIÓ ósimi 6.5%-dy qurap, bul kórsetkish boiynsha 6-orynǵa turaqtap otyr.
Sonymen qatar halyq sany 20.4 million adamdy (32-oryn) qurasa, jumyssyzdyq deńgeii 4.6%-dy (31-oryn) jáne tutyný baǵalarynyń infliatsiiasy 11.4%-dy (65-oryn) kórsetti.
