Eldiń strategiialyq mańyzy bar jáne qala quraýshy kásiporyndarynda zań men ekonomikalyq qaýipsizdikti qamtamasyz etý boiynsha Ishki ister ministrligi júieli negizde jumys júrgizip keledi. Ónerkásip sektoryna zalal keltiretin urlyqtardy, kóleńkeli shemalardy jáne ózge de zańsyz áreketterdi anyqtaý men olardyń jolyn kesýge erekshe nazar aýdarylýda, - dep habarlaidy Ult.kz Polisia.kz-ke silteme jasap.
"Ulytaý oblysynda ótken jyldan beri politsiia "Qazaqmys korporatsiiasy" aýmaǵynan urlyq jasaǵan birneshe qylmystyq toptyń áreketin toqtatty. Qabyldanǵan sharalardyń nátijesinde keltirilgen shyǵynnyń 94,5%-y óteldi. Mysaly, jergilikti qylmystyq toptardyń jetekshiligimen áreket etken qylmystyq top músheleri sottaldy. Olar quramynda baǵaly metaldardyń mólsheri joǵary ken qorytpalaryn urlaý shemasyn uiymdastyrǵan. Tek biyldyń ózinde politseiler iri kólemde shyǵyn keltirilgen tórt urlyqty ashty. 7 mamyr kúni Memlekettik kúzet qyzmetimen birlesip kompaniia aýmaǵynan janarmai urlaýǵa bailanysty zańsyz áreketterdiń joly kesildi. Jedel is-sharalar barysynda urlyqty uiymdastyrdy jáne keiin janar-jaǵarmai materialdaryn satýmen ainalysty degen kúdikke ilingen tulǵalar ustaldy. Bir tonnadan astam janarmai, iri kólemdegi qarajat, kólik quraldary, oq-dárileri bar qarý jáne zańsyz shemada paidalanylǵan ózge de zattai dáleldemeler tárkilendi. Tergeý barysynda urlyq arnaiy tehnikaǵa jalǵan janarmai quiý jáne qujattardy qoldan jasaý arqyly júzege asyrylǵany anyqtaldy. Sonymen qatar kúzet qurylymdarynyń jekelegen qyzmetkerleri tarapynan kómek kórsetý fakileri de áshkerelendi. Qazirgi ýaqytta tergeý-jedel is-sharalarynyń kesheni júrgizilýde, qarjylyq-sharýashylyq qujattamaǵa taldaý jasalyp jatyr, keltirilgen shyǵyn kólemi anyqtalýda. Aldyn ala málimet boiynsha shyǵyn asa iri kólemde bolýy múmkin", - dedi IIM uiymdasqan qylmysqa qarsy kúres departamentiniń ókili Qýandyq Alpys.
