"Islam memleketi" (IM) ekstremistik uiymy jetekshileri "Abý Bakr ál-Baǵdadidiń daýysy" dep jańa aýdio jazba jariialady.
46 minýtqa sozylatyn aýdio jazbany 28 qyrkúiekte IM-men bailanysy bar Al-Furqan aqparattyq saity taratty. Daýystyń qashan jazylǵany belgisiz.
Aýdioda ózin IM basshysy Abý Bakr ál-Baǵdadi dep tanystyrǵan adam Soltústik Koreianyń taiaýda Japoniia men AQSh-qa doq kórsetip, shúilikkenin aitady. Ol buǵan qosa shildede Irak áskeri azat etken Mosýl qalasy siiaqty IM bekingen qalalar úshin shaiqastar týraly da aitady.
Baǵdadidiń daýysy delingen aýdio jazba sońǵy ret 2016 jyldyń qarashasynda jariialanǵan bolatyn.
Londonda ornalasqan Syrian Observatory for Human Rights (SOHR) uiymy shildede IM-niń óz arasyndaǵy derekkózderinen Abý Bakr ál-Baǵdadidiń kózi joiylǵanyn rastaǵanyn habarlaǵan edi. Biraq onyń qashan jáne qalai ajal qushqany belgisiz.
Resei áskerileri maýsymda Baǵdadidiń mamyrdyń sońynda Siriianyń Rakka qalasynda áýe shabýyldarynda qaza tapqan bolýy múmkin dep boljap otyrǵanyn, biraq ony áli de naqtylaýǵa tyrysyp jatqanyn málimdegen bolatyn. Ótken aida AQSh áskeri qolbasshysy IM basshysy áli tiri bolýy múmkin ekenin málimdegen.
2014 jyldyń jazynda Siriia men Iraktyń biraz bóligin basyp alǵan IM sodyrlary sońǵy ailarda eki eldegi biraz territoriiasynan aiyrylǵan.
