Tailand astanasy Bangokta ótken jatqan jasóspirimder arasyndaǵy álem chempionatynda Qazaqstan quramasy úsh altyn, bir kúmis jáne eki qola medal enshiledi, - dep habarlaidy Baq.kz.
Qazaqstan sportshylary arasynan aldymen 62 kelide synǵa túsken Anatolii Savelev altyn medal aldy. Ol julqa kóterýde 127 keli, serpe kóterýde 184 keli ziltemirdi kóterdi. Qos jattyǵý qorytyndysy boiynsha 16 jastaǵy Savelev 281 kelini baǵyndyrdy. Kúmisti 276 kelini eńsergen qytailyq Iýnban Vei, qolany 267 kelimen nátijemen indoneziialyq Halim Setiavan ielendi.
Anatolii Almaty oblysynyń týmasy. Jasóspirimder arasynda Qazaqstan chempiony, sport sheberligine úmitker.
Ekinshi altyndy 85 kelige deiin salmaqta synǵa túsken Artem Antropov enshiledi. Keibir sport mamandary bul jigittiń bolashaq «Ilia Ilin» degen pikirler aitýda. Ol ózine berilgen múmkindikterdiń bárin sátti paidalandy. Otandasymyz qos jattyǵý qorytyndysy boiynsha 323 kelini kóterdi. Ekinshi oryn alǵan Polsha atleti 318 keli, úshinshi oryn alǵan irandyq sportshy 304 kelini kóterdi. Julqa kóterýde qarsylasynan bes keli qalyp qoiǵan Artem, serpe kóterýde on kelige ozyp ketti.
Úshinshi altyndy 75 kelidegi Olga Pastýhova syilady. Ol julqada 91 keli, serpede 120 kelini kóterdi. Sóitip qossaiystyń qorytyndysy boiynsha 211 kelimen top jardy. Ekinshi oryn alǵan ózbek sportshysy otandasymyzdan 4 kelige qalyp qoidy. Osy salmaqta synǵa túsken taǵy bir qazaqstandyq sportshy Mariia Bazarkina (83+105) 188 kelimen altynshy orynnan kórindi.
Qazaqstan quramasynda úsh altyn, bir kúmis jáne eki qola medal bar.
