Denis Tenniń kóz jumǵanyn estigen sportshy Ilia Ilin áli de óz-ózine kele almai jatqanyn jazdy. Sportshynyń mezgilsiz qazasy ziltemirshiniń qabyrǵasyn qaiystyryp jibergen.
"Búgin Qazaqstanda oryn alǵan qaiǵyly jaǵdaidan áli óz-ózime kele alar emespin. Búgin biz danyshpan sportshydan, ǵajaiyp adamnan, óziniń jastyǵyna qaramai bizdiń elimiz úshin kóp nárse jasaǵan, júrekterimizge qýanysh syilaǵan adamnan aiyryldyq. Búgin biz meni únemi biik oi-órisimen, asqan mádenietimen tańǵaldyratyn meniń kishkentai inim - Denis Tendi joǵalttyq. Denis únemi maǵan qarap boi túzeitinin aitatyn, alaida oǵan qarap men boi túzep, myqty bolýǵa talpynatynmyn. Onyń endi aramyzda joq ekenin moiyndaý qandai qiyn. Denistiń otbasy men jaqyndaryna qaiǵyryp kóńil aitamyn", - dep jazba qaldyrdy Ilia Ilin.
Eske sala ketsek, beisenbi kúni Almatyda tanymal mánerlep syrǵanaýshy Denis Tendi pyshaqtap ketkeni habarlandy.
Qalalyq IID baspasóz qyzmetiniń habarlaýynsha, oqiǵa Qurmanǵazy Baiseiitova kósheleriniń qiylysynda túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn. 2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
