Adamzat tarihynyń jańa dáýiri bastaldy. Áigili amerikalyq Space X kompaniiasynyń iesi Ilon Mask Falcon Heavy aýyr zymyran tasyǵyshyn ǵaryshqa ushyrdy.
Zymyran tasyǵysh 6 aqpan kúni Astana ýaqyty boiynsha 02:40-ta (16:40 EST) Florida shtatynyń Kanaveral múiisindegi Kennedi kosmodromynan Jer men Mars arasyndaǵy orbitaǵa ushyryldy. Ol Marsqa Tesla Roadster kóligin jetkizedi dep boljanýda.
Falcon Heavy álemdegi eń qýatty jáne eń kóp júk kóteretin zymyran sanalady. Tasymaldaýshy 63,8 tonna júkti jetkize alady, ony ushyrýdyń quny – 90-120 million dollar.
Ǵarysh kemesiniń bortyna Ilon Masktyń Tesla Roadster sporttyq kóligi tielip, skafandr kigizilgen qýyrshaq adam otyrǵyzylǵan. "Don't Panic" degen jazýy bar kólik panelinde Devid Boýidyń "Space Oddity" áni oinap tur. Sonymen qatar kólikte arnaiy beinebaqylaý kameralary ornatylǵan.
Esterińizge sala keteiik, byltyr mamyr aiynda SpaceX Falcon Heavy aýyr zymyran tasyǵyshynyń ortalyq blogyn synaqtan ótkizildi. Space X kompaniiasy Falcon Heavy-diń údetkish bloktaryn ekinshi qaitara ǵaryshqa ushyrýdy josparlap otyr. Bul iske assa, onda ǵaryshqa ushý men júk jetkizý baǵasy arzandaýy múmkin.
