18-28 sáýirde Qytaidyń Ninbo qalasynda aýyr atletikadan Aziia chempionaty ótedi. Bul jarysqa Qazaqstannan 18 atlet qatysady.
Olardyń arasynda doping daýyna ilinip, keiin sportqa qaita oralǵan Ilia Ilin men Zúlfiia Chinshanlo, Rio olimpiadasynyń chempiony Nijat Rahimov, Rio olimpiadasynda kúmis medal alǵan Jazira Japparqul bar. Qazaqstanǵa Qytaidan kelgen Arli Chontei men Farhad Harki de Aziia chempionatyna qatysady.
Aziia chempionatyna baratyn Qazaqstan aýyr atletika quramasynyń tolyq tizimi:
Erler:
- Arli Chontei (55 kg);
- Farhad Harki (67 kg);
- Nurlybek Samenov (81 kg);
- Denis Ýlanov (81 kg);
- Nijat Rahimov (89 kg);
- Ilia Ilin (96 kg);
- Rústem Sybai (96 kg);
- Aleksandr Zaichikov (109 kg);
- Ibragim Bersanov (109 kg);
- Selimhan Abýbakirov (+109 kg).
Áielder:
- Zúlfiia Chinshanlo (55 kg);
- Karina Goricheva (64 kg);
- Ekaterina Stoliarenko (71 kg);
- Ekaterina Bykova (76 kg);
- Jazira Japparqul (71 kg);
- Raýshan Meshithanova (81 kg);
- Larisa Kobeleva (87 kg);
- Aizada Múptildá (+ 87 kg).
Ilia Ilin Pekin jáne London olimpiadalarynda, Zúlfiia Chinshanlo London olimpiadasynda doping qoldandy dep aiyptalyp, eki jylǵa sporttan shettetilgen. Ekeýi de olimpiadada alǵan altyndaryn qaitarǵan.
Sportshylardyń jaza ýaqyty 2018 jyly jazda aiaqtalǵan. Ilin qarashada Ashǵabatta ótken álem chempionatyna qatysýy tiis bolǵan. Biraq sportshy jaraqatyna bailanysty jarysqa shyqpaǵan. Al Chinshanlo ashǵabattaǵy jarysqa qatysyp, 55 kelide 5-oryn alǵan.
Doping jazasynan keiin sportqa qaita oralǵan Ilin men Chinshanlo Tokio olimpiadasyna qatysýdy josparlaidy. "Doping daýyna" kóp ilingen Qazaqstan 2020 jyly ótetin olimpiada bir er, bir áiel aýyr atlet qana apara alady.
