QR Premer-Ministri Asqar Maminniń tóraǵalyǵymen ótken Úkimet otyrysynda QR ishki ister ministri Erlan Turǵymbaev avtojoldardaǵy qaýipsizdikti qamtamasyz etý boiynsha qabyldanyp jatqan sharalar týraly baiandady, dep habarlaidy "Ult aqparat".
Ministrdiń aitýynsha, ótken aptada aýa raiynyń qolaisyzdyǵyna bailanysty birqatar joldarda qozǵalys toqtatyldy. Aýa raiynyń qaýipti bolýy týraly eskertýler buqaralyq aqparat quraldary men SMS arqyly taratyldy. Alaida, osy eskertýlerge qaramastan, tótenshe jaǵdailar kezinde kóptegen júrgizýshiler jolǵa shyqqan.
Ministrdiń aitýynsha, aýa-raiy jaǵdailary joldardaǵy jaǵdaiǵa keri áserin tigizdi. Atap aitqanda, temperatýranyń «nól gradýsqa» deiin kúrt kóterilýi jáne sonyń saldarynan kóktaiǵaqtyń qalyptasýy, sonymen qatar jańbyr men qar jaýýynyń, tumannyń áserinen joldyń kórinýiniń shektelýi.
Sonymen birge, politsiia apatty jaǵdailardy azaitý maqsatynda kún saiyn respýblikalyq jáne jergilikti buqaralyq aqparat quraldary arqyly kúrdeli meteorologiialyq jaǵdailarda kólik quraldaryn paidalaný jáne kólik qozǵalysynyń shekteýleri týraly aqparat taratty.
Buǵan qosa, E. Turǵymbaevtyń aitýynsha, kóptegen júrgizýshiler aqaýy bar kólik quraldaryn júrgize otyryp, qozǵalysy jabyq qaýipti ýchaskelerge ainalma joldar boiynsha jolǵa shyqqan.
«Jol qozǵalysy erejelerin eskermei, kóktaiǵaq pen joldyń kórinýi shekteýli jaǵdaida jyldamdyq rejimin buzyp, qashyqtyqty saqtamaǵannyń saldarynan jol-kólik oqiǵalary oryn aldy», — dedi ministr.
Ishki ister organdary kommýnaldyq qyzmettermen jáne jergilikti atqarýshy organdarmen birlesip, keptelisterdi joiý, joldardy tazartý, inertti materialdardy sebý, evakýatsiialaý jáne azamattarǵa shuǵyl kómek kórsetý sharalaryn oryndady.
Barlyǵy qar qursaýynan 120-dan astam avtomashina men 900-den astam adam evakýatsiialandy. Evakýatsiialanǵan azamattar jaqyn mańdaǵy eldi mekenderde ornalasqan jylý pýnktterine ornalastyryldy. Óńirlerde azamattarǵa kómek kórsetý úshin jedel shtabtar quryldy.
E. Turǵymbaevtyń aitýynsha, adamdardy qutqarýǵa TJK-niń 200-den astam qyzmetkeri men 300 politsiia qyzmetkeri, 170 birlik qutqarý tehnikasy men politsiia mashinalary, sondai-aq jergilikti atqarýshy organdar men jol qyzmetteriniń arnaiy tehnikalary tartylǵan.
«Trassalyq meditsinalyq-qutqarý pýnkteriniń brigadalary JKO bolǵan jerlerge 42 sapar jasady, 41 azamatqa meditsinalyq kómek kórsetti», — dedi ministr.
Qazirgi ýaqytta joldardaǵy jaǵdai turaqtandyryldy, olardyń qaýipsiz jumys isteýin qamtamasyz etýge barlyq qajetti tehnikalar men adam resýrstary tartyldy.
«Alaida, 8 óńirde aýa-raiy áli de turaqsyz. Olar: Shyǵys Qazaqstan, Atyraý, Aqmola, Qostanai, Qyzylorda, Pavlodar, Soltústik Qazaqstan jáne Túrkistan oblystary. Osyǵan bailanysty biz oblystardyń ákimderin jaǵdaidy baqylaý jáne jol qaýipsizdigin qamtamasyz etý úshin birlese jumys isteýge shaqyramyz», — dep túiindedi Ishki ister ministri.
