Ishki ister ministriniń orynbasary Aleksei Kalaichidi ministrlik "Asyl arna" telearnasynyń direktory, aitysker aqyn Muhamedjan Tazabektiń "politseilerge ýaǵyz júrgizý" faktisin tekserip jatyr dep habarlady.
Buǵan deiin internette Tazabektiń politseilerge úlken zalda lektsiia oqyp jatqany týraly video tarap, qoǵamda qyzý talqylanǵan. Videoda Tazabek "qoǵam tynyshtyǵy" jaily sóz qozǵap, politseilerdiń zań buzǵandardy qatań jazalaýy siiaqty shetel tájiribesinen mysal da keltiredi.
"Árbir memlekettik organnyń aqparattyq jumys júrgizý jospary bolady. Olar suhbat ótkizýge laiyqty dep tapqan qoǵam qairatkerlerlerin shaqyrady. Al naqty jaǵdaida qazir biz bul kezdesýdiń mańyzdylyǵyn, mazmunyn, formatyn tekserip jatyrmyz. Baǵa bergennen keiin sheshim qabyldaimyz. Tekserý aiaqtalmaiynsha, túsinikteme bermeimin" dedi Kalaichidi beisenbi kúni senat otyrysynan keiin jýrnalisterge.
Áleýmettik jelide qyzý talqylanǵan videodan keiin keibir sarapshylar “din saiasatqa aralasyp otyr” degen qaýip aitqan. Keibir áleýmettik jeli qoldanýshylary Tazabek "el tynyshtyǵyn oilap otyr" dep qoldasa, keibiri "dindi saiasat pen jaǵympazdyqqa aralastyrýǵa bolmaidy" dep aiyptaǵan.
Al Muhamedjan Tazabektiń ózi Facebook-taǵy paraqshasynda "lektsiia mazmuny burmalanǵanyn" aityp, muny "kezekti jala" dep atady. Bul daýdan keiin de Qazaqstannyń keibir mektepterinde "Tazabek lektsiialary" ótetini týraly habarlamalar tarady.
