Búgin Nur-Sultan, Almaty, Semei, Qaraǵandy jáne Aqtóbe qalalarynda mitingiler ótti, narazylyq kezinde shamamen 80 adam ustalǵan. Bul týraly Qazaqstan ishki ister ministrligi málimdedi.
"1 mamyrda Nur-Sultan, Almaty, Semei, Qaraǵandy jáne Aqtóbe qalalarynda Bas prokýratýranyń resmi habarlamasyna qaramastan, sanktsiialanbaǵan mitingiler men azamattardyń jinalýy oryn aldy. Aktsiiaǵa qatysýshylarǵa ózderiniń ustanymdary men áleýmettik jáne basqa da problemalyq máseleler boiynsha pikirlerin erkin jáne ashyq bildirýge múmkindik berildi. Alaida Nur-Sultan jáne Almaty qalalarynda jinalǵandardyń ishinen birqatar adamdar ózderin agressiialyq túrde ustap, tyiym salynǵan "DVK" ekstremistik uiymynyń urandaryn aiqailap aityp, qoǵamdyq tártipti buzdy" delingen habarlamada.
Osyǵan bailanysty ákimdikter men prokýratýra ókilderi beibit mitingiler, jinalystar men sherýler ótkizý tártibi týraly zańnamanyń erejelerin túsindirgen.
"Jekelegen azamattar zańsyz áreketterdi toqtatý týraly talaptarǵa baǵynbady. Sodan keiin politsiia kúshimen qoǵamdyq tártipti qalpyna keltirýge jáne tártip buzýshylardy ustaý sharalary qabyldandy. Nátijesinde elordada jáne Almatyda politsiia bólimderine 80 azamat jetkizildi. Olardyń áreketterine zańda belgilengen tártippen quqyqtyq baǵa beriletin bolady" deidi vedomstvo ókilderi.
Ishki ister ministrligi azamattarǵa arandatýshylyqqa berilmeýge jáne Qazaqstan Respýblikasynyń zańnama talaptaryn saqtaýǵa shaqyrdy.
