Ishki ister ministrliginiń jedel-kriminalistikalyq departamenti bazasynda ushqyshsyz aviatsiialyq júielerdiń oqý-jattyǵý zerthanasy ashyldy. Munda politsiia qyzmetkerleri drondardy basqarý boiynsha arnaiy daiyndyqtan ótedi, dep habarlaidy ult.kz.
Jańa zerthana ishki ister organdaryn tsifrlandyrý jáne jańǵyrtý aiasynda iske qosylǵan. Oqytý baǵdarlamasy teoriialyq sabaqtardy, arnaiy simýliatorlardaǵy jattyǵýlardy jáne kompiýterlik tájiribelik kýrstardy qamtidy.
IIM jedel-kriminalistikalyq departamentiniń bas kriminalisi Rollan Moldybaevtyń aitýynsha, jobanyń basty maqsaty – zamanaýi tehnologiialardy kúndelikti qyzmette tiimdi qoldana alatyn mamandardy daiarlaý.
Qazirgi tańda ushqyshsyz ushý apparattary politsiia jumysynyń mańyzdy quralyna ainalyp keledi. Olar túngi baqylaý júrgizýge, áýeden barlaý jasaýǵa, joǵalǵan adamdardy izdeýge jáne oqiǵa oryndaryn jedel tekserýge múmkindik beredi. Drondar joǵary sapaly kameralarmen jáne jylý anyqtaǵysh qurylǵylarmen jabdyqtalǵan.
Sonymen qatar tehnologiialar taýly aimaqtar, keń dalalar jáne jetýi qiyn nysandardy baqylaý kezinde de tiimdi qoldanylyp otyr. Bul izdestirý jumystaryn jedeldetip, quqyq qorǵaý organdarynyń áreket etý múmkindigin arttyrady.
Ministrlik málimetinshe, drondardyń tiimdiligi óńirlerde de dáleldengen. Máselen, Túrkistan oblysynda ushqyshsyz apparattyń kómegimen mal urlyǵy deregi jedel ashylyp, kúdiktilerdiń qozǵalysy anyqtalǵan jáne urlanǵan múlikti satyp alýshyny tabýǵa múmkindik beretin dálelder jinalǵan.
Vedomstvo ókilderi ushqyshsyz tehnologiialardy engizý politsiia jumysynyń jedeldigi men dáldigin arttyryp, qoǵamdyq qaýipsizdikti qamtamasyz etýge oń áser etetinin atap ótti.
