Bastyqtar tarapynan jasalǵan qatelikterge kóz jumyp qaramaimyz. Bul málimdemeni QR Ishki ister ministrliginiń baspasóz qyzmeti taratty.
Baspasóz qyzmetiniń málimetterine qaraǵanda, QR IIM qyzmetkerlerge joǵary talaptar qoiatyn «kúrdeli» mamandyqtardyń biri, óitkeni adamdardyń taǵdyry olar qabyldaǵan sheshimderge bailanysty bolady. Sondyqtan olar belgili bir dárejede qoǵam múddesin bildiredi.
Qyzmet nysany, memlekettik qurylymdarǵa degen qatynas politseilerge joǵary talap qoiady, azamattar syn kózben qaraidy.
Búginde politsiia qyzmetkerleriniń qatarynda ózderiniń qyzmettik boryshyn adal atqaryp júrgender az emes. Táýelsizdik alǵannan beri 1500-ge jýyq qyzmetker memlekettik nagradalarǵa ie boldy, onyń ishinde 131 politsei óz ómirin qyzmet jolynda qurban etti.
Alaida, keibir qyzmetkerler tártip saqshysy bola tura, zańdardy buzady. Qarapaiym sypaiylyqtyń bolmaýy, tártip pen azamattardyń quqyqtaryn buzý, sybailas jemqorlyq jáne basqa da teris qylyqtar jasaý ishki ister organdarynda qyzmet etetin barlyq adamdardyń atyna kir keltiredi.
Sondyqtan politsiia qyzmetkerleri tártip pen zańdylyqtyń buzylýyna jol berse, Ishki ister ministrliginde bul tótenshe oqiǵa retinde qabyldanady.
Olardyń ishinde – Oral qalasynda ýchaskelik politsiia inspektory kómekshisiniń qatysýymen bolǵan JKO saldarynan áiel adamnyń qaza bolýy, Qyzylorda qalasynda patrýldik politsiia inspektorynyń mas kúiinde qyzmet atqaryp, qyzmettik avtokólikti basqarýy, Nur-sultan qalasynda eki patrýldik politsiia qyzmetkerine qatysty sot úkiminiń shyǵýy siiaqty jaǵdailar bar.
Ishki ister ministrligi tártip buzýshylarǵa ǵana emes, sondai-aq olardyń basshylaryna da qatań sharalar qabyldap keldi jáne aldaǵy ýaqytta da solai bolady.
Ólimmen aiaqtalǵan jol – kólik oqiǵasy úshin jergilikti politsiia qyzmeti men Oral qalasy Politsiia basqarmasynyń basshylyǵy tártiptik jazaǵa tartyldy, al qyzmetkerdiń tikelei basshysy qyzmetinen bosatyldy.
Qaramaǵyndaǵy qyzmetkerdiń qyzmetine tiisti baqylaý jasamaǵany úshin Qyzylorda qalalyq IIB patrýldik politsiia batalony komandiriniń orynbasary laýazymynan bosatyldy jáne taǵy 3 basshyǵa, onyń ishinde Qyzylorda qalalyq Politsiia basqarmasy bastyǵynyń birinshi orynbasaryna «qatań sógis» jariialandy.
Tártip buzýshylardyń ózderi qyzmetke qaita alý quqyǵynsyz ishki ister organdarynan birden bosatyldy.
«IIM-niń Ózindik qaýipsizdik departamentine kináli qyzmetkerlerdi qatań tártiptik jaýapqa tartý jóninde naqty tapsyrma beremin. Bólimshelerdegi zańdylyq pen tártip olardyń basshylyǵynyń mindeti. Biz kinálilerdiń eshbirine kóz juma qaramaimyz jáne aiamaimyz!»- dep málimdedi ishki ister ministri Erlan Turǵymbaev IIM qyzmetteri men bólimsheleriniń basshylarymen ótken keńeste.
Buǵan deiin habarlanǵandai, IIM-de sybailas jemqorlyqqa jol bergen qyzmetkerlerdiń basshylaryn jeke jaýapqa tartý printsipi engizilgen.
Sonymen qatar, kadrlyq ózgerister men attestattaý komissiiasynyń qorytyndysy boiynsha aǵymdaǵy jyly ortalyq apparat jáne óńirlik departament qyzmetteriniń basshylyq quramy 60% - ǵa jańartyldy.
