Qazaqstannyń ishki ister ministrliginde Aqtaýdaǵy dámhanadaǵy jarylysqa sebep bolý múmkin nusqalar aityldy, - dep habarlaidy Tengrinews.kz tilshisi.
IIM tergeý departamentiniń bastyǵy Sanjar Ádilov jarylys týraly dabyl 7-nen 8 qarashaǵa qaraǵan túni túskenin aitty. Onyń aitýynsha, jarylys kezinde kafe jumys istemegen. Qylmystyq isti tergeý barysynda úsh gaz ballony tárkilenip, birneshe nusqasy ázirlenip jatyr. Negizgi nusqa - ashanadaǵy gaz ballonynyń jarylýy.
"Birinshi nusqa - qysqa tuiyqtalý, ádette elektr symymen bailanysty, al ekinshisi - gaz ballonynyń jarylýy. Ázirshe osyndai eki nusqa bar. Bul oqiǵada qylmystyq sipattaǵy nusqa alynyp tastalady. Ádilet ministrliginiń, sot saraptamasy ortalyǵynyń sarapshylarymen jáne TJ qyzmetkerlerimen, ákimdik ókilderimen birge júrgizilip jatqan oqiǵa ornyn tekserý jumystary adam ólimi joq ekenin, eshkim jaraqat almaǵanyn kórsetedi", - dedi ol.
Onyń aitýynsha, keshen mańynda ornalasqan saýda úii men ashana qiraǵan.
"Birneshe avtokólik búlindi, jaqyn mańdaǵy ǵimarattar qirady. Shyǵyndy anyqtap jatyrmyz. Zardap shekkender joq, eshkim osy jarylys saldarynan aýrýhanaǵa barǵan joq. Beinejazbalar boiynsha oqiǵa ornyn tekserýge jedel tergeý toby quryldy. Qazir zardap shekken adamdardyń sanyn, olardyń kólikterin, qundy zattaryn naqtylaý boiynsha sharalar qabyldap jatyrmyz. Saýda úiinde dúkender de boldy, osy baǵytta jumysty jalǵastyramyz, jarylys saldarynan zardap shekkenderden Mańǵystaý oblysynyń PD-ne nemese 102 telefony boiynsha habarlasýdy suraimyn. Óńirde jedel-tergeý toby jumys isteidi. Bárinen jaýap alamyz, zalal somasyn naqtylaimyz, zardap shekkenderge qatysty qylmystyq zańnamada kózdelgen tergeý áreketterin júrgizemiz", - dep qosty Ádilov.
Eske salaiyq, 7 qarashada keshke Aqtaýda "Sherqala" kesheninde ornalasqan eki qabatty "Aian" dámhanasynda oqys jarylys bolyp, nátijesinde ǵimarat qiraǵan edi. Zardap shekkender týraly aqparat joq
