Jeńildetilgen avtonesie baǵdarlamasynyń bastalý merzimi týraly suraqqa Indýstriia jáne infraqurylymdyq damý ministrligi Indýstriialyq damý komiteti basshysynyń orynbasary Oljas Saparbekov jaýap bere almady, - dep habarlaidy Tengrinews.kz.
"Baǵdarlama qashan iske qosylady, bankter ótinimderdi qashan qabyldap bastaidy? Meniń bilýimshe, bankter áli qarajat alǵan joq", - dedi jýrnalist OKQ brifinginde.
"Biz óz tarapymyzdan qaýlyny pysyqtadyq, Úkimet bekitti. Qazirgi ýaqytta osy baǵdarlamany iske asyrý úshin "Jasyl damý" AQ-dan qarajat berý rásimi júrgizilip jatyr. Bul másele jaqyn arada sheshiledi dep úmittenemin", - dedi Saparbekov.
Onyń aitýynsha, Úkimet qaýlyny 15 sáýirde qabyldaǵan. Ol baǵdarlama 100 milliard teńge kóleminde jańa avtonesie baǵdarlamasyn qarjylandyrýdy qarastyrady.
Qazaqstan avtobiznes qaýymdastyǵynyń vitse-prezidenti Anar Maqasheva qoiylǵan suraqqa baǵdarlamada kóptegen máseleler bar dep jaýap berdi.
"Eger azamat osy baǵdarlama boiynsha avtokólik satyp alǵan bolsa, ol sol baǵdarlama boiynsha ekinshi kólikti tek 2 jyldan keiin satyp ala alady. Baǵdarlama ázirlenip, naqty erejeler pysyqtalyp jatyr, sońǵy qorytyndy keiinirek aitylady. Sebebi naqty qandai bankter qarjylandyrylady degen sekildi máseleler bar. Munyń bári anyqtalǵannan keiin, taǵy bir brifing ótkizip, tutynýshylarymyzǵa qadamdyq nusqaýlar berýge bolady. Óndirýshilerdiń ózderi de suranysty qamtamasyz etý úshin qazir osy baǵdarlamaǵa daiyndalyp jatyr", - dedi ol.
